இந்தியன் வங்கி சிறப்பு டெபாசிட் திட்டங்களுக்கான வட்டியை 0.15 சதவீதம் உயர்த்தியுள்ளது. இந்த உயர்வு இன்று (வெள்ளிக்கிழமை) முதல் அமலுக்கு வருகிறது.
இது தொடர்பாக வங்கி வெளியிட்ட செய்திக்குறிப்பில் கூறியிருப்பதாவது: ‘இண்ட் க்ரோ’ (555 நாட்கள்), ‘இண்ட் பிராஸ்பர்’ (777 நாட்கள்) ஆகிய சிறப்பு நிரந்தர வைப்புத் திட்டங்களுக்கான வட்டி விகிதம், 0.15 சதவீதம் உயர்த்தப்படுகிறது. இதன்படி, ‘இண்ட் க்ரோ’ திட்டத்துக்கான வட்டி விகிதம் 6.65 சதவீதத்தில் இருந்து 6.80 சதவீதமாகவும், ‘இண்ட் பிராஸ்பர்’ திட்டத்துக்கான வட்டி 6.60 சதவீதத்தில் இருந்து 6.75 சதவீதமாகவும் உயர்த்தப்பட்டுள்ளது. வாடிக்கையாளர்கள் இந்தச் சிறப்பு வைப்புத் திட்டங்கள் குறித்த கூடுதல் விவரங்களை அருகிலுள்ள இந்தியன் வங்கிக் கிளையில் தெரிந்துகொள்ளலாம். இவ்வாறு அதில் தெரிவிக்கப்பட்டுள்ளது.
