சன் பார்மா நிறுவனம், அமெரிக்காவைச் சேர்ந்த ஆர்கனான் நிறுவனத்தைக் கையகப்படுத்தியதற்கான நிதித் தேவையின் ஒரு பகுதியைச் சமாளிக்க, ரூ.10,000 கோடியை கடன் பத்திரங்கள் மூலம் திரட்டுகிறது.
இந்த நிதி திரட்டல் இரண்டு தவணைகளாக மேற்கொள்ளப்படுகிறது. இதில், ரூ.7,000 கோடிக்கான கடன் பத்திரங்களுக்கு 8.20 சதவீத வட்டியும், ரூ.3,000 கோடிக்கான கடன் பத்திரங்களுக்கு 8.05 சதவீத வட்டியும் நிர்ணயிக்கப்பட்டுள்ளன. இந்தக் கடன் பத்திரங்கள் வரும் 2031-ம் ஆண்டில் முதிர்ச்சியடையும். ரூ.3,000 கோடி தவணைக்கான கடன் பத்திரங்களில், 2028-ம் ஆண்டில் முதலீட்டாளர்கள் முன்கூட்டியே பணத்தைத் திரும்பப் பெறுவதற்கான வாய்ப்பும் வழங்கப்பட்டுள்ளது.
இதற்கு முன்னதாக, ரூ.15,000 கோடி வரையிலான மாற்ற முடியாத கடன் பத்திரங்களை வெளியிடுவதற்கு சன் பார்மா நிறுவனத்தின் இயக்குநர் குழு ஒப்புதல் அளித்திருந்தது.
கடந்த ஏப்ரல் மாதம், ஆர்கனான் நிறுவனத்தை 11.75 பில்லியன் அமெரிக்க டாலர் நிறுவன மதிப்பில் முழுப் பணப் பரிவர்த்தனை அடிப்படையில் கையகப்படுத்த சன் பார்மா ஒப்புக்கொண்டது.
இந்தக் கடன் பத்திர வெளியீட்டில் காப்பீட்டு நிறுவனங்கள், ஓய்வூதிய நிதி நிறுவனங்கள் மற்றும் பரஸ்பர நிதி நிறுவனங்கள் பங்கேற்கும் என எதிர்பார்க்கப்படுகிறது. கிரிசில் ரேட்டிங்ஸ் நிறுவனம், இந்தக் கடன் பத்திரங்களுக்கு ஏஏஏ தர மதிப்பீட்டை வழங்கியுள்ளது. எஸ்பிஐ கேபிடல் மார்க்கெட்ஸ், ஸ்டாண்டர்ட் சார்ட்டர்டு வங்கி மற்றும் எம்யூஎஃப்ஜி செக்யூரிட்டீஸ் இந்தியா ஆகியவை இந்தக் கடன் பத்திர வெளியீட்டை ஏற்பாடு செய்கின்றன.
