நாடு முழுவதும் ரயில்வேயில் பயணச்சீட்டு வழங்குநர், தட்டச்சர் உள்ளிட்ட 1688 கிளார்க் பணியிடங்களுக்கு பிளஸ்2 தேர்ச்சி பெற்றவர்கள் விண்ணப்பிக்க ரயில்வே தேர்வு வாரியம் அழைப்பு விடுத்துள்ளது.
வழக்கமாக தெற்கு ரயில்வேயில் காலியாக உள்ள பணியிடங்களுக்கு சென்னை, திருவனந்தபுரம் ரயில்வே தேர்வு வாரியம்(ஆர்ஆர்பி) தேர்வு செய்யும். இப்போது டெல்லியில் உள்ள ரயில்வே தேர்வு வாரியமே எல்லா மண்டலங்களில் உள்ள பணியிடங்களுக்கு ஆட்களை தேர்வு செய்து வருகிறது.இந்நிலையில் பயணச்சீட்டு வழங்குநர்-700, கணக்கர்/தட்டச்சர்-200, இளநிலை தட்டச்சர்-600, டிரெயின் அமைச்சு பணியாளர்-188 என மொத்தம் 1688 பணியிடங்களுக்கு விண்ணப்பிக்க மத்திய ஆர்ஆர்பி அழைப்பு விடுத்துள்ளது. இவற்றில் சென்னை ஆர்ஆர்பி மண்டலத்தில் 168, திருவனந்தபுரம் ஆர்ஆர்பி மண்டலத்தில் 75 பணியிடங்களும் உள்ளன. இந்த பதவிகளுக்கு விண்ணப்பிக்க 12ம் வகுப்பு தேர்ச்சி பெற்றிருக்க வேண்டும். வயது வரப்பு 18 முதல் 30க்குள் இருக்க வேண்டும். ஈடபிள்யூஎஸ், ஓபிசி, எஸ்சி/எஸ்டி பிரிவினருக்கு வயது வரம்பில் சலுகை வழங்கப்படும்.
விண்ணப்பக் கட்டணம் உண்டு. தேர்வு ஆன்லைனில் நடத்தப்படும். தகுதி உள்ளவர்கள் 15-11-2026 தேதிக்குள் ஆன்லைன் மூலம் மட்டுமே விண்ணப்பிக்க வேண்டும்.
விண்ணப்பிக்கும் முறை, இணைப்புகள், கட்டணத் தொகை, பதவி வாரியாக கல்வித் தகுதிகள் உட்பட மேலும் விவரங்கள் முழுமையாக அறிய https://rrb.indianrailways.gov.in என்ற தேர்வு வாரிய இணைய தளத்தை பார்க்கவும்.
