தமிழ்நாட்டின் பொருளாதாரத்தை 2036-ஆம் ஆண்டிற்குள் 1.5 டிரில்லியன் டாலர் அளவாக உயர்த்துவதற்கான புதிய வரைபடத்தை கிரெடாய் அமைப்பு தனது ஐந்தாவது 'ஸ்டேட் கான் 2026' மாநாட்டில் வெளியிட்டுள்ளது.
இந்த அறிக்கையின்படி, சென்னை மாநகரத்தை மட்டுமே மையமாகக் கொண்ட வளர்ச்சி முறை மாற்றப்பட்டு, சேலம், கோயம்புத்தூர், மதுரை, திருச்சிராப்பள்ளி, ஓசூர் மற்றும் தூத்துக்குடி உள்ளிட்ட முக்கிய இரண்டாம் நிலை நகரங்கள் பிராந்திய வளர்ச்சியின் முக்கிய தூண்களாக அடையாளப்படுத்தப்பட்டுள்ளன.புதிய அறிக்கையின் முக்கிய அம்சங்களின்படி, தமிழ்நாட்டின் ரியல் எஸ்டேட் துறை பங்களிப்பை தற்போதைய 32 பில்லியன் டாலரிலிருந்து 200 பில்லியன் டாலராக உயர்த்த திட்டமிடப்பட்டுள்ளது. இந்த இலக்கை அடைய சேலம் மற்றும் பிற வளர்ந்து வரும் பிராந்திய மையங்களில் உள்கட்டமைப்பு வசதிகளை துரிதப்படுத்த வேண்டியது அவசியமாகும். மேலும், நீலகிரி, கொடைக்கானல், வேலூர், தஞ்சாவூர் மற்றும் கரூர் உள்ளிட்ட புதிய நகர கிளைகளையும் கிரெடாய் இணைத்துள்ளது, இது மாநிலம் முழுவதும் முறைப்படுத்தப்பட்ட வீட்டுவசதி மற்றும் ரியல் எஸ்டேட் வளர்ச்சியை துரிதப்படுத்தும். முதலீடுகளை ஈர்ப்பது, பிராந்திய இணைப்புகளை மேம்படுத்துவது மற்றும் டிஜிட்டல் முறையில் விரைவான அனுமதிகளை வழங்குவது ஆகியவை சேலம் மற்றும் பிற இரண்டாம் நிலை நகரங்களின் வளர்ச்சிக்கு வழிவகுக்கும் என்று அறிக்கை சுட்டிக்காட்டுகிறது.
சேலம் உள்ளிட்ட வளர்ந்து வரும் இரண்டாம் நிலை நகரங்களை உள்ளடக்கி கட்டமைக்கப்பட்ட திட்டங்களை செயல்படுவதன் மூலம், சமச்சீரான பிராந்திய வளர்ச்சி சாத்தியமாகும் எனவும், இது தமிழ்நாட்டின் ஒட்டுமொத்த பொருளாதார இலக்கை எட்டுவதில் முக்கிய பங்கு வகிக்கும் எனவும் எதிர்பார்க்கப்படுகிறது.
