டாடா குழுமத்தின் இந்தியன் ஹோட்டல்ஸ் நிறுவனம், செப்டம்பரில் முடிவடைந்த இரண்டாம் காலாண்டில் ரூ.379.85 கோடி ஒருங்கிணைந்த நிகர லாபம் ஈட்டியுள்ளது.
முந்தைய ஆண்டின் இதே காலாண்டில் பதிவான ரூ.318.26 கோடியுடன் ஒப்பிடுகையில் இது 19.35 சதவீத உயர்வாகும். செயல்பாட்டு வருவாய் 21.7 சதவீதம் அதிகரித்து ரூ.2,484.32 கோடியை எட்டியுள்ளது.
தாஜ் உள்ளிட்ட ஹோட்டல்களை நடத்தும் இந்நிறுவனம், உள்நாட்டு மற்றும் வெளிநாட்டு வர்த்தகத்தின் வலுவான செயல்பாட்டால் வளர்ச்சி கண்டுள்ளது. மேலும், நடப்பு நிதியாண்டுக்கான ஒருங்கிணைந்த வருவாய் வளர்ச்சி இலக்கை 12–14 சதவீதத்திலிருந்து 15–17 சதவீதமாக உயர்த்தியுள்ளது.
சமூக நிகழ்ச்சிகள், மாநாடுகள் மற்றும் புதிய ஹோட்டல்களின் பங்களிப்பு, வரும் காலாண்டுகளிலும் வளர்ச்சிக்கு ஆதரவளிக்கும் என நிறுவனம் எதிர்பார்க்கிறது. வலுவான தேவையும் இந்த எதிர்பார்ப்புக்கு முக்கிய அடிப்படையாக உள்ளது.
