நுகர்வோர் மின்னணுப் பொருட்களை வழங்கும் விஸ்கான் இண்டஸ்ட்ரீஸ் நிறுவனம், ரூ.110 கோடி வரை திரட்டுவதற்கான ஆரம்பப் பொதுப் பங்கு வெளியீட்டை அக்டோபர் 27-ம் தேதி தொடங்குகிறது. பங்கு ஒன்றின் விலை வரம்பு ரூ.194 முதல் ரூ.204 வரை நிர்ணயிக்கப்பட்டுள்ளது.
புதுடெல்லியைச் சேர்ந்த இந்நிறுவனத்தின் பங்கு வெளியீடு அக்டோபர் 29-ம் தேதி நிறைவடைகிறது. மொத்தம் 53.92 லட்சம் பங்குகள் வெளியிடப்படுகின்றன. இதில் 43.14 லட்சம் புதிய பங்குகளும், நிறுவனத்தின் புரமோட்டர் சித்தாந்த் டால்மியா விற்கும் 10.78 லட்சம் பங்குகளும் அடங்கும்.
ஒரு லாட் 600 பங்குகளைக் கொண்டது. குறைந்தபட்சம் இரண்டு லாட்கள், அதாவது 1,200 பங்குகளுக்கு விண்ணப்பிக்க வேண்டும். அதிகபட்ச விலையில் இதற்கான முதலீடு ரூ.2,44,800 ஆகும். பங்குகள் நவம்பர் 3-ம் தேதி பிஎஸ்இ எஸ்எம்இ தளத்தில் பட்டியலிடத் திட்டமிடப்பட்டுள்ளது.
புதிய பங்கு வெளியீட்டின் நிகரத் தொகையில் ரூ.50.04 கோடி, துணை நிறுவனமான டால்மியா டெக்னாலஜீஸில் முதலீடு செய்யப்படும். இதில் ரூ.15.04 கோடி ஆலை மற்றும் இயந்திரங்களை வாங்குவதற்கும், ரூ.35 கோடி கூடுதல் நடைமுறை மூலதனத் தேவைகளுக்கும் பயன்படுத்தப்படும்.
மேலும், நிறுவனத்தின் நடைமுறை மூலதனத்துக்கு ரூ.17 கோடியும், சந்தைப்படுத்துதல் மற்றும் விளம்பர நடவடிக்கைகளுக்கு ரூ.5.23 கோடியும் பயன்படுத்தப்படும். எஞ்சிய நிகரத் தொகை பொது நிறுவனத் தேவைகளுக்குச் செலவிடப்படும்.
இந்நிறுவனம் எல்இடி தொலைக்காட்சிகள், ஏர் கூலர்கள், சலவை இயந்திரங்கள் மற்றும் குளிரூட்டிகளை (ஏசி) விஸ்கான் என்ற பெயரில் விற்பனை செய்கிறது.
