வெளிநாட்டு நிறுவன முதலீட்டாளர்கள் செப்டம்பரில் இந்தியப் பங்குகளை 410 கோடி டாலர் மதிப்புக்கு விற்றுள்ளனர். இது முந்தைய இரண்டு மாதங்களில் அவர்கள் மேற்கொண்ட பங்கு முதலீட்டில் 84 சதவீதத்துக்கு இணையானது என சிஎல்எஸ்ஏ ஆய்வறிக்கை தெரிவித்துள்ளது.
அக்டோபரிலும் விற்பனை தொடர்ந்துள்ள நிலையில், இதுவரை மேலும் 360 கோடி டாலர் வெளியேறியுள்ளது. செப்டம்பரில் நிஃப்டி 50 குறியீடு 6.1 சதவீதம் சரிந்தது. தகவல் தொழில்நுட்பம் மற்றும் வாகனத் துறைப் பங்குகள் அதிக சரிவைச் சந்தித்தன.
இதற்கிடையே, வெளிநாட்டு முதலீட்டாளர்கள் நிதித்துறை பங்குகளுக்கான ஒதுக்கீட்டை 56 அடிப்படைப் புள்ளிகள் உயர்த்தியுள்ளனர். மூன்று மாதங்களாகக் குறைவான ஒதுக்கீட்டில் இருந்த இத்துறை, நடுநிலையை எட்டியுள்ளது.
மறுபுறம், உள்நாட்டு பரஸ்பர நிதிகளின் பங்கு முதலீட்டுத் திட்டங்களுக்கு வந்த நிதி, முந்தைய மாதத்தைவிட 25 சதவீதம் அதிகரித்து ரூ.59,200 கோடியானது. மாதாந்திர எஸ்ஐபி முதலீடு ரூ.32,500 கோடி என்ற சாதனை அளவை எட்டியது.
எனினும், புதிய எஸ்ஐபி கணக்குகளுடன் ஒப்பிடும்போது நிறுத்தப்பட்ட கணக்குகளின் விகிதம் 116 சதவீதமாக உயர்ந்துள்ளது. இது 18 மாதங்களில் அதிகபட்சமாகும். சிறிய மற்றும் நடுத்தர நிறுவனப் பங்கு நிதிகளுக்கு முறையே ரூ.9,000 கோடி, ரூ.7,800 கோடி வந்துள்ளது.
வெளிநாட்டு முதலீட்டாளர்களின் விற்பனைக்கு மத்தியிலும் உள்நாட்டு முதலீட்டாளர்களின் ஆதரவு தொடர்வதை இந்தப் புள்ளிவிவரங்கள் காட்டுகின்றன. அதேவேளையில், எஸ்ஐபி நிறுத்தங்கள் அதிகரிப்பது கவனிக்கப்பட வேண்டியதாக உள்ளது.
