ஈரோட்டில் இந்திய தர நிர்ணய அமைப்பான பிஎஸ்ஐ அங்கீகாரம் பெற்ற தங்க நகை மதிப்பீடு மற்றும் ஹால்மார்க்கிங் மையங்களின் எண்ணிக்கையை அதிகரிக்க வேண்டும் என்று நகை வியாபாரிகள் வலியுறுத்தி உள்ளனர்.
இதுகுறித்து சங்கச் செயலாளர் பிரகாஷ் கூறுகையில், "ஈரோட்டில் தற்போது 2 ஹால்மார்க் மையங்கள் மட்டுமே செயல்படுகின்றன. கூடுதல் மையங்கள் அமைக்கப்பட்டால், சிறு நகை வியாபாரிகள், தங்களது நகைகளின் தரத்தைப் பரிசோதித்து, ஹால்மார்க் முத்திரை பெறுவது எளிதாகும்.
மேலும், பல்வேறு வடிவமைப்புகளில் தரச்சான்று பெற்ற நகைகளை விற்பனை செய்யும் பிராண்டட் நகை நிறுவனங்களுடன் சிறு வியாபாரிகளும் போட்டியிட முடியும். ஹால்மார்க் முத்திரை நகையின் தூய்மைக்கான உறுதியை நுகர்வோருக்கு வழங்குகிறது" என்றார்.
சிறிய நகைக் கடைகள் தாலி உள்ளிட்ட பாரம்பரிய நகைகளை தயாரிப்பதில் முக்கியப் பங்கு வகிக்கின்றனர். எனவே, அந்த நகைகளை ஹால்மார்க் முத்திரையோடு வழங்குவது அவசியம் என்று சிறிய நகைக்கடை உரிமையாளர்கள் கோரிக்கை விடுத்துள்ளனர்.
