சிறு, நடுத்தர நிறுவனங்களில் நேரடியாகப் பங்கு முதலீடு செய்வதற்காக ‘எஸ்எம்இ வளர்ச்சி நிதி’ உருவாக்கும் வகையில் ரூ.10,000 கோடி திட்டத்துக்கு மத்திய அமைச்சரவை ஒப்புதல் அளித்துள்ளது.
பிரதமர் நரேந்திர மோடி தலைமையில் நடைபெற்ற அமைச்சரவைக் கூட்டத்தில் இந்த முடிவு எடுக்கப்பட்டது. உற்பத்தி, சேவை, தொழில்நுட்பம் மற்றும் புதுமை சார்ந்த துறைகளில் செயல்படும் இந்திய நிறுவனங்கள், உலக அளவில் போட்டியிடும் முன்னணி நிறுவனங்களாக வளர உதவுவதே இந்த நிதியின் நோக்கமாகும். இதற்கான அறிவிப்பு 2026–27 மத்திய பட்ஜெட்டில் இடம்பெற்றிருந்தது.
சிறு, குறு நிறுவனங்கள் வேலைவாய்ப்பு, ஏற்றுமதி, உற்பத்தி மற்றும் புதுமைப் பணிகளில் முக்கியப் பங்களிப்பை வழங்குகின்றன. இவற்றுக்குக் கடன் கிடைப்பதை மேம்படுத்த பல்வேறு நடவடிக்கைகள் எடுக்கப்பட்டுள்ளன. எனினும், தொழிலை விரிவாக்குவதற்குத் தேவையான நீண்டகாலப் பங்கு மூலதனம் கிடைப்பதில் இடைவெளி நீடிப்பதாக மத்திய அரசு தெரிவித்துள்ளது.
தற்போதுள்ள பங்கு முதலீட்டு ஆதரவு நிதிகளில் பெரும்பாலானவை தொடக்கநிலை நிறுவனங்களையும், குறு நிறுவனங்களையும் மையமாகக் கொண்டுள்ளன. வளர்ச்சிப் பாதையில் உள்ள சிறு, நடுத்தர நிறுவனங்களின் முதலீட்டுத் தேவையைப் பூர்த்தி செய்யும் வகையில் புதிய நிதி உருவாக்கப்படுகிறது.
வணிகச் செயல்பாட்டின் சாத்தியத்தையும், விரிவடையும் திறனையும் நிரூபித்த, அதிக வளர்ச்சி வாய்ப்புள்ள நிறுவனங்களுக்கு நீண்டகாலப் பங்கு முதலீடு வழங்கப்பட உள்ளது. தொழில் வளர்ச்சியின் முக்கியமான கட்டங்களில் உள்ள நிறுவனங்களுக்கு இந்த முதலீடு உதவும் என்று அரசு தெரிவித்துள்ளது.
இந்த நிதியின் பெரும்பகுதி உற்பத்தியை மையமாகக் கொண்ட சிறு, நடுத்தர நிறுவனங்களுக்கு வழங்கப்படும். இரண்டாம் மற்றும் மூன்றாம் நிலை நகரங்களில் உள்ள தொழில் தொகுப்புகளில் செயல்படும் நிறுவனங்களும் பரிசீலிக்கப்படும்.
புதிய தொழில்நுட்பங்களைப் பயன்படுத்துதல், உற்பத்தித் திறனை அதிகரித்தல், வெளிநாட்டுச் சந்தைகளில் நுழைதல், பிற நிறுவனங்களைக் கையகப்படுத்துதல் போன்ற முயற்சிகளுக்கு இந்த நிதி ஆதரவளிக்கும். உலகளாவிய உற்பத்தி மற்றும் விநியோகச் சங்கிலிகளில் இந்திய நிறுவனங்கள் இணைவதற்கும் உதவும் என எதிர்பார்க்கப்படுகிறது.
எஸ்எம்இ வளர்ச்சி நிதிக் கட்டமைப்பின் கீழ் அமைக்கப்படும் மாற்று முதலீட்டு நிதிக்கு மத்திய அரசு மொத்தம் ரூ.10,000 கோடி பங்களிப்பு உறுதியை வழங்கும். இதன் மூலம் தொழில்முனைவோரை வலுப்படுத்தவும், வளர்ச்சிநிலை நிறுவனங்களுக்கான உள்நாட்டு மூலதனச் சந்தையை விரிவுபடுத்தவும் அரசு திட்டமிட்டுள்ளது.
சிறிய நகரங்களின் தொழில் தொகுப்புகளில் மேற்கொள்ளப்படும் முதலீடுகள், உள்ளூர் விநியோகச் சங்கிலிகளை வலுப்படுத்தி, பிராந்தியங்களிடையே சமச்சீரான தொழில் வளர்ச்சிக்கு உதவும். உற்பத்தித் திறன், ஏற்றுமதிப் போட்டித் திறன் மற்றும் தரமான வேலைவாய்ப்புகள் மேம்படும் என அரசு எதிர்பார்க்கிறது.
தொழில் தொடங்குவதையும் நடத்துவதையும் எளிதாக்கும் சீர்திருத்தங்கள், மின்னணுமயமாக்கல், கடன் ஆதரவு, அரசு கொள்முதல் சீர்திருத்தங்கள், புத்தொழில் ஊக்குவிப்பு மற்றும் உற்பத்தியுடன் இணைந்த ஊக்கத்தொகைத் திட்டங்களுக்கு இந்த நிதி துணையாக இருக்கும். 2047-க்குள் வளர்ந்த இந்தியாவை உருவாக்கும் இலக்கின் ஒரு பகுதியாக இந்த முயற்சி மேற்கொள்ளப்படுவதாக மத்திய அரசு தெரிவித்துள்ளது.
நிறுவனங்களுக்கான விண்ணப்ப நடைமுறை, விரிவான தேர்வுத் தகுதிகள், ஒவ்வொரு நிறுவனத்துக்கும் வழங்கப்படும் முதலீட்டுத் தொகை மற்றும் முதலீட்டு நிபந்தனைகள் குறித்த விவரங்கள் இந்த அறிவிப்பில் இடம்பெறவில்லை. நடைமுறை வழிகாட்டுதல்கள் வெளியான பிறகே, நிதியைப் பெறுவதற்கான வாய்ப்புகளை தொழில்முனைவோர் தெளிவாக மதிப்பிட முடியும் என்பது குறிப்பிடத்தக்கது.
