சென்னை:
ராமேஸ்வரத்தில் புதிய விமான நிலையம் அமைக்கும் பணிகளை தீவிரப்படுத்தியுள்ள தமிழக அரசு, மத்திய விமானப் போக்குவரத்து அமைச்சகத்திடம் விரைவில் தள அனுமதி கோரத் திட்டமிட்டுள்ளது.புனித ஸ்தலமான ராமேஸ்வரம் மற்றும் அதன் சுற்றுவட்டாரப் பகுதிகளுக்கு வருகை தரும் சுற்றுலாப் பயணிகளின் எண்ணிக்கையைக் கருத்தில் கொண்டு, பிராந்திய பொருளாதாரத்தை மேம்படுத்தும் நோக்கத்திலும் கடந்த 2025-ம் ஆண்டு இந்த விமான நிலையத் திட்டம் அறிவிக்கப்பட்டது.
இதற்காக ராமநாதபுரம் மாவட்டத்தில் பல இடங்கள் பரிசீலிக்கப்பட்ட நிலையில், இறுதியாக மாணிக்கனேரி மற்றும் கும்பரம் பகுதிகள் ஆய்வுக்கு எடுத்துக் கொள்ளப்பட்டன. பின்னர், இந்திய விமான நிலைய ஆணையம் (ஏஏஐ) அதிகாரிகள் தீவிர ஆய்வுக்குப் பிறகு, சுமார் 600 ஏக்கரில் மாணிக்கனேரி பகுதி விமான நிலையம் அமைக்கத் தேர்வு செய்யப்பட்டது.
ராமேஸ்வரம் ராமநாத சுவாமி கோயில், தனுஷ்கோடி, அரிச்சல்முனை மற்றும் முன்னாள் ஜனாதிபதி அப்துல் கலாம் நினைவிடம் போன்ற முக்கிய சுற்றுலா, ஆன்மிகத் தலங்கள் இப்பகுதியில் அமைந்துள்ளன. தற்போது சாலை, ரயில் போக்குவரத்தை நம்பியுள்ள பயணிகளுக்கு இந்த விமான நிலையம் மிகப்பெரிய வசதியாக அமையும்.
தற்போது இதற்கான நிலம் கையகப்படுத்தும் பணிகள் மும்முரமாக நடந்து வரும் நிலையில், தமிழ்நாடு தொழில் வளர்ச்சி நிறுவனம் (டிட்கோ) மூலமாக மத்திய அரசின் தள அனுமதி பெறும் நடவடிக்கைகள் நடைபெற்று வருகின்றன.
எனினும், திட்டத்துக்கான திட்ட செலவுத் தொகை, கட்டுமானப் பணிகள் தொடங்கும் நாள், விமானச் சேவை எப்போது தொடங்கும் என்பது குறித்த அதிகாரப்பூர்வ காலக்கெடு இன்னும் அறிவிக்கப்படவில்லை. அரசின் அனுமதி கிடைத்தவுடன் அடுத்தடுத்த மத்திய நகர்வுகள் வேகம் பெறும் என்று எதிர்பார்க்கப்படுகிறது.
