யுபிஐ பரிவர்த்தனைகளுக்கான வணிகர் சேவைக் கட்டணத்தை (எம்டிஆர்) அமல்படுத்துவது தள்ளிப்போகலாம் என்ற தகவலால், பேடிஎம், ஒன் மொபிக்விக், பைன் லேப்ஸ் உள்ளிட்ட நிதித் தொழில்நுட்ப நிறுவனங்களின் பங்குகள் நேற்று சரிவுடன் வர்த்தகத்தை நிறைவு செய்தன.
அக்டோபர் 15-ம் தேதி முதல் அமலுக்கு வரவிருந்த எம்டிஆர் கட்டணத்தை ஜனவரி 1-ம் தேதிக்கு ஒத்திவைக்கும் திட்டம் பரிசீலனையில் இருப்பதாக தகவல்கள் வெளியாகியுள்ளன. இதுதொடர்பான முடிவு அடுத்த சில நாட்களில் வெளியாகும் என்று கூறப்படுகிறது.
மும்பை பங்குச் சந்தையில், பேடிஎம் நிறுவனத்தின் தாய் நிறுவனமான ஒன் 97 கம்யூனிகேஷன்ஸ் பங்கு, வர்த்தகத்தின் இடையே 10 சதவீதம் வீழ்ந்து ரூ.1,560.60-ஐ தொட்டது. வர்த்தக முடிவில் 5.42 சதவீதம் சரிந்து ரூ.1,640-ஆக இருந்தது.
ஒன் மொபிக்விக் சிஸ்டம்ஸ் பங்கு, வர்த்தகத்தின் இடையே 8.43 சதவீதம் குறைந்து ரூ.234.40-ஆக இருந்தது. பின்னர் 4.57 சதவீத சரிவுடன் ரூ.244.30-ல் நிறைவடைந்தது.
பைன் லேப்ஸ் பங்கு 4.95 சதவீதம் சரிந்து ரூ.168.75-ஐ தொட்ட நிலையில், வர்த்தக முடிவில் 4.39 சதவீதம் குறைந்து ரூ.169.75-ஆக இருந்தது. நெட்வொர்க் பீப்பிள் சர்வீசஸ் டெக்னாலஜீஸ் பங்கு 3.39 சதவீதம் சரிந்து ரூ.1,791.30-ல் நிறைவடைந்தது.
ரூ.2,000-க்கு மேற்பட்ட யுபிஐ பரிவர்த்தனைகளுக்கு 0.4 சதவீத வணிகர் சேவைக் கட்டணம் வசூலிக்க மத்திய அரசு கடந்த மாதம் அனுமதி அளித்தது. இதனால் கூடுதல் வருவாய் கிடைக்கும் என்ற எதிர்பார்ப்பில், அப்போது நிதித் தொழில்நுட்ப நிறுவனங்களின் பங்குகள் உயர்ந்தன.
கட்டண அறிவிப்புக்குப் பிறகு உயர்ந்திருந்த இந்தப் பங்குகள், அமலாக்கத்தை ஒத்திவைப்பது குறித்த தகவல்கள் வெளியான நிலையில் தற்போது சரிவைச் சந்தித்துள்ளன. எனினும், ஒத்திவைப்பு குறித்து இறுதி முடிவு எடுக்கப்பட்டதாகத் தகவல் இல்லை.
இதனிடையே, உத்தேச யுபிஐ கட்டணத்தை அரசு திரும்பப் பெற வேண்டும் என்று பொருளாதார ஆய்வு அமைப்பான ஜிடிஆர்ஐ நேற்று வலியுறுத்தியுள்ளது. வணிகர்கள் மற்றும் நுகர்வோருக்கு டிஜிட்டல் பணப்பரிவர்த்தனை தொடர்ந்து இலவசமாக இருக்க வேண்டும் என்றும் அந்த அமைப்பு தெரிவித்துள்ளது. அக்டோபர் 15 முதல் கட்டணம் விதிக்கும் திட்டத்தைக் கைவிடுமாறும் அரசை அந்த அமைப்பு கேட்டுக்கொண்டுள்ளது.
