அமெரிக்க வர்த்தக மோதல் தொடர்பான நிச்சயமின்மை, நிறுவனங்களின் லாப வளர்ச்சி குறித்த கவலைகளால், 2026 ஆண்டு இறுதிக்கான நிஃப்டி இலக்கை 26,000 புள்ளிகளிலிருந்து 25,000 புள்ளிகளாக முதலீட்டு ஆய்வு நிறுவனமான பெர்ன்ஸ்டீன் குறைத்துள்ளது.
இந்தியப் பங்குச்சந்தையில் ஓரளவு மீட்சி ஏற்படலாம் என்றாலும், தொடர்ச்சியான உயர்வுக்கான வாய்ப்புகள் குறைவாகவே இருப்பதாக அந்நிறுவனம் தெரிவித்துள்ளது. ஆண்டின் தொடக்கத்தில் நிர்ணயிக்கப்பட்ட 28,100 புள்ளிகள் இலக்கு, ஏற்கெனவே 26,000 ஆகக் குறைக்கப்பட்டிருந்தது.
உயர்ந்த கச்சா எண்ணெய் விலை, பொருளாதாரச் சூழலில் பின்னடைவு, நிறுவனங்களின் லாப மதிப்பீடுகளில் குறிப்பிடத்தக்க முன்னேற்றமின்மை ஆகியவை சந்தைக்குச் சவால்களாக உள்ளன.
நிஃப்டியின் அடுத்த பன்னிரண்டு மாதங்களுக்கான விலை–லாப விகிதம் 16.6 மடங்காக, ஆறு ஆண்டுகளில் குறைந்த நிலைக்குச் சரிந்துள்ளது. இருப்பினும், பல ஆசியச் சந்தைகளுடன் ஒப்பிடுகையில் இந்தியப் பங்குகள் இன்னும் அதிக மதிப்பீட்டிலேயே இருப்பதாக பெர்ன்ஸ்டீன் சுட்டிக்காட்டியுள்ளது.
பலவீனமான பருவமழை, குறைந்த நீர்த்தேக்க அளவுகள், புவிசார் அரசியல் பதற்றங்களும் அபாயங்களாகக் குறிப்பிடப்பட்டுள்ளன.
நீண்டகால மூலதன ஆதாய வரியைக் குறைப்பது மட்டுமே நிலையான வெளிநாட்டு முதலீடுகளை ஈர்க்கப் போதாது. பொருளாதார வளர்ச்சியும் நிறுவன லாபங்களும் மேம்படுவது அவசியம் என அந்நிறுவனம் தெரிவித்துள்ளது.
எதிர்பார்க்கப்படும் சந்தை மீட்சி, சமீபத்திய சரிவுக்குப் பிந்தைய இயல்பான மீளெழுச்சியாகவே இருக்கும் என்றும், இந்தியப் பங்குகளின் ஒட்டுமொத்த வளர்ச்சிக் கண்ணோட்டத்தில் பரவலான முன்னேற்றத்தைக் குறிப்பதாக அதைக் கருத முடியாது என்றும் பெர்ன்ஸ்டீன் தனது ஆய்வறிக்கையில் மேலும் விளக்கியுள்ளது.
