ஃபிளிப்கார்ட் குழுமத்தைச் சேர்ந்த மிந்த்ரா நிறுவனத்தின் 2025–26 நிதியாண்டு செயல்பாட்டு வருவாய் ரூ.5,242.5 கோடியாக பதிவாகியுள்ளது. விளம்பர சேவைகள் மூலம் கிடைத்த வருவாய் 35.2 சதவீதம் அதிகரித்துள்ளது.
நிறுவனப் பதிவாளர் அலுவலகத்தில் தாக்கல் செய்யப்பட்ட நிதிநிலை அறிக்கையின்படி, விளம்பர வருவாய் ரூ.914.5 கோடியிலிருந்து ரூ.1,236.4 கோடியாக உயர்ந்துள்ளது. சந்தைத் தள சேவைகள் மூலம் ரூ.2,657.3 கோடி வருவாய் கிடைத்துள்ளது.
சரக்குப் போக்குவரத்து சேவைகளைத் தவிர்த்த வருவாய் 12 சதவீதம் உயர்ந்து ரூ.4,123.3 கோடியாக உள்ளது. இருப்பினும், மொத்த செயல்பாட்டு வருவாய் முந்தைய ஆண்டின் ரூ.6,063.8 கோடியிலிருந்து குறைந்துள்ளது.
நிறுவனத்தின் மொத்த செலவுகள் ரூ.5,757.7 கோடியாக அதிகரித்துள்ளன. முந்தைய ஆண்டில் ரூ.411 கோடி வரிக்கு முந்தைய லாபம் ஈட்டிய நிலையில், தற்போது ரூ.441.9 கோடி இழப்பு ஏற்பட்டுள்ளது.
இதற்கிடையே, நடப்பு நிதியாண்டில் வாடிக்கையாளர்கள் எண்ணிக்கை சுமார் 30 சதவீதம் அதிகரித்துள்ளது. பண்டிகைக் காலத்தில் மாதாந்திர செயலில் உள்ள பயனாளர்கள் எண்ணிக்கை 10 கோடியை எட்டும் என நிறுவனம் எதிர்பார்க்கிறது.
அக்டோபர் 8-ல் தொடங்கிய பிக் ஃபேஷன் திருவிழாவின் முதல் நாளில் வழக்கத்தைவிட நான்கு மடங்கு தேவை அதிகரித்ததாகவும் நிறுவனம் தெரிவித்துள்ளது.
