எல் அண்ட் டி நிறுவனத்தின் மின் பரிமாற்றம் மற்றும் விநியோகப் பிரிவு, இந்தியா மற்றும் வெளிநாடுகளில் ரூ.10,000 கோடி முதல் ரூ.15,000 கோடி வரையிலான மதிப்புப் பிரிவில் பல்வேறு புதிய ஒப்பந்தங்களைப் பெற்றுள்ளது.
மின் பரிமாற்றக் கட்டமைப்பை வலுப்படுத்தவும், புதுப்பிக்கத்தக்க ஆற்றலை மின்தொகுப்புடன் இணைக்கவும் இத்திட்டங்கள் உதவும் என நிறுவனம் தெரிவித்துள்ளது.சவுதி அரேபியாவில் 380 கிலோவோல்ட் மின் பரிமாற்றப் பாதைகள், துணை மின் நிலையங்கள் தொடர்பான பணிகள் கிடைத்துள்ளன. ஐக்கிய அரபு அமீரகத்தில் 132/11 கிலோவோல்ட் துணை மின் நிலையங்கள் அமைத்தல் மற்றும் அவற்றுடன் தொடர்புடைய கேபிள் பணிகளுக்கான ஒப்பந்தம் பெறப்பட்டுள்ளது.
இந்தியாவில், விசாகப்பட்டினத்தில் மின் பரிமாற்றப் பாதைகள் மற்றும் துணை மின் நிலையங்கள் அடங்கிய கட்டமைப்பை அமைக்க முன்னணி தனியார் நிறுவனத்திடமிருந்து ஒப்பந்தம் கிடைத்துள்ளது.
பல்வேறு நாடுகளில் சிக்கலான மின் கட்டமைப்புத் திட்டங்களைச் செயல்படுத்தும் நிறுவனத்தின் திறனை இந்த ஒப்பந்தங்கள் வெளிப்படுத்துவதாக இப்பிரிவின் தலைவர் ஜோஜி செபாஸ்டியன் தெரிவித்தார். மின் கட்டமைப்பு மேம்பாடு, புதுப்பிக்கத்தக்க ஆற்றல் ஒருங்கிணைப்பு ஆகியவற்றுக்கான தேவை அதிகரித்து வருவதாகவும் அவர் கூறினார்.
