புதுமைகளை மையமாகக் கொண்டு முதலீடு செய்யும் கோட்டக் பயோனியர் ஃபண்ட், தொடங்கப்பட்டதிலிருந்து 20.97% ஆண்டு கூட்டு வருவாய் ஈட்டியுள்ளதாக நிறுவனத்தின் செப்டம்பர் 2026 தரவுகள் தெரிவிக்கின்றன. இதன் ஒப்பீட்டுக் குறியீட்டு வருவாய் 16.53% ஆகும்.
அக்டோபர் 2019-ல் தொடங்கப்பட்ட இந்த திறந்தநிலை பங்கு முதலீட்டுத் திட்டத்தின் நிர்வகிக்கப்படும் சொத்து மதிப்பு, செப்டம்பர் 30 நிலவரப்படி ரூ.4,294 கோடியாக இருந்தது.கடந்த ஐந்து ஆண்டுகளில் இத்திட்டம் 13.31% ஆண்டுக்கூட்டு வருவாயைப் பதிவு செய்துள்ளது. இதே காலத்தில் ஒப்பீட்டுக் குறியீடு 10.96% வருவாய் அளித்துள்ளது. மூன்று ஆண்டுகளில் திட்டத்தின் வருவாய் 18.84% ஆகவும், குறியீட்டின் வருவாய் 14.46% ஆகவும் உள்ளது.
தொழில்நுட்பம், தயாரிப்புகள், உற்பத்தி முறைகள், விநியோகம் மற்றும் வணிக நடைமுறைகளில் புதுமைகளைப் பயன்படுத்தும் நிறுவனங்களில் இத்திட்டம் முதலீடு செய்கிறது. பெரிய, நடுத்தர மற்றும் சிறிய சந்தை மதிப்புள்ள நிறுவனங்கள் இதன் முதலீட்டுத் தொகுப்பில் இடம்பெற்றுள்ளன.
சில்லறை வர்த்தகம், சுகாதாரச் சேவைகள், தொழில்துறை உற்பத்தி, வாகனங்கள், வாகன உதிரிப்பாகங்கள், போக்குவரத்து, நுகர்வோர் சாதனங்கள் மற்றும் வங்கித்துறைகளிலும் முதலீடுகள் உள்ளன.
மொத்த முதலீட்டுத் தொகுப்பில் வெளிநாட்டு பரஸ்பர நிதிகளின் பங்கு 17.20% ஆகும். உலகளாவிய நிதிகள் மற்றும் பரிவர்த்தனை வர்த்தக நிதிகள் வாயிலாகவும் முதலீடு செய்ய இத்திட்டத்திற்கு அனுமதி உள்ளது. ஐந்து ஆண்டுகள் அல்லது அதற்கு மேலான நீண்ட கால முதலீட்டுக் காலத்தை நோக்கமாகக் கொண்டுள்ளதாக நிறுவனம் தெரிவித்துள்ளது.
