ரிலையன்ஸ் இண்டஸ்ட்ரீஸின் டிஜிட்டல் மற்றும் தொலைத்தொடர்பு நிறுவனமான ஜியோ பிளாட்ஃபார்ம்ஸ், முதல்முறை பொதுப் பங்கு வெளியீட்டுக்கான விளக்க ஆவணத்தை நேற்று தாக்கல் செய்துள்ளது. பங்கு வெளியீடு அக்டோபர் 21-ல் தொடங்கி 23-ல் நிறைவடைகிறது.
இந்தியாவின் மிகப்பெரிய ஐபிஓவாக இது அமையும் என எதிர்பார்க்கப்படுகிறது. வெளியீட்டில் தலா ரூ.10 முகமதிப்புள்ள 27 கோடி வரையிலான புதிய பங்குகள் இடம்பெறுகின்றன. முன்னணி முதலீட்டாளர்களுக்கான ஏலம் அக்டோபர் 19-ல் நடைபெறும். பங்குகள் அக்டோபர் 28-ல் பட்டியலிடப்படும் என எதிர்பார்க்கப்படுகிறது. விலை வரம்பு அறிவிக்கப்படவில்லை. சுமார் ரூ.30,000 கோடி திரட்ட நிறுவனம் திட்டமிட்டுள்ளதாகத் தகவல்கள் தெரிவிக்கின்றன.
தகுதியுள்ள ஜியோ ஊழியர்களுக்கு ரூ.500 கோடி வரையிலும், ரிலையன்ஸ் பங்குதாரர்களுக்கு ரூ.2,500 கோடி வரையிலும் ஒதுக்கீடு செய்யப்பட்டுள்ளது. அக்டோபர் 14 நிலவரப்படி ரிலையன்ஸ் பங்குகளை வைத்துள்ள தனிநபர்கள் மற்றும் இந்து கூட்டுக் குடும்பங்கள் பங்குதாரர் ஒதுக்கீட்டுக்குத் தகுதியானவர்கள்.
ஜூனில் தாக்கல் செய்யப்பட்ட வரைவு ஆவணத்தின்படி, 2025–26 நிதியாண்டில் நிறுவனத்தின் ஒருங்கிணைந்த செயல்பாட்டு வருவாய் 14.6 சதவீதம் உயர்ந்து ரூ.1,46,885 கோடியாகவும், நிகர லாபம் 15.1 சதவீதம் அதிகரித்து ரூ.30,049 கோடியாகவும் இருந்தது. சந்தாதாரர்கள் எண்ணிக்கை 52.4 கோடியைக் கடந்தது. மார்ச் காலாண்டில் பயனாளர் ஒருவரின் சராசரி மாத வருவாய் ரூ.214 ஆக இருந்தது.
திரட்டப்படும் நிதி, துணை நிறுவனமான ரிலையன்ஸ் ஜியோ இன்ஃபோகாமின் குறிப்பிட்ட கடன்களை முன்கூட்டியே அடைக்கவும் பொதுவான நிறுவனத் தேவைகளுக்கும் பயன்படுத்தப்படும் என வரைவு ஆவணம் தெரிவித்துள்ளது.
முழுவதும் புதிய பங்குகள் வெளியிடப்படுவதால், நிதி நிறுவனத்திற்கே செல்லும். புரமோட்டர் குழுமத்தை அதிகம் சார்ந்திருப்பதை வரைவு ஆவணம் அபாயமாகக் குறிப்பிட்டுள்ளது.
ஐபிஓ தேதி: அக்டோபர் 21–23; முன்னணி முதலீட்டாளர் ஏலம் அக்டோபர் 19.
பங்கு வெளியீடு: 27 கோடி வரை புதிய பங்குகள்; முகமதிப்பு ரூ.10. விலை வரம்பு அறிவிக்கப்படவில்லை.
சிறப்பு ஒதுக்கீடு: ஊழியர்களுக்கு ரூ.500 கோடி வரை; ரிலையன்ஸ் பங்குதாரர்களுக்கு ரூ.2,500 கோடி வரை.
நிதி திரட்டல்: சுமார் ரூ.30,000 கோடி எனதகவல்; கடன் அடைப்பு, நிறுவனத் தேவைகளுக்குப் பயன்பாடு.
