அக்டோபர் மாதத்துக்கான பங்குகளின் இலக்கு விலை - முழு விவரம்

மும்பை:

அக்டோபர் மாதத்துக்கான பங்கு பரிந்துரைகளை 360 ஒன் கேபிடல் ரிசர்ச் நிறுவனம் வெளியிட்டுள்ளது. இதில் நிலக்கரி, மின்சாரம், வங்கி, எஃப்எம்சிஜி, மருந்து, காப்பீடு மற்றும் உள்கட்டமைப்பு துறைகளைச் சேர்ந்த 8 பங்குகள் இடம்பெற்றுள்ளன.
கோல் இந்தியா: இலக்கு விலை ரூ.516. மின் உற்பத்தி நிலையங்களில் நிலக்கரி கையிருப்பு அதிகரிப்பது, அனல் மின் உற்பத்தி வலுவாக இருப்பது ஆகியவை நிலக்கரி தேவை மற்றும் விற்பனை விலைக்கு சாதகமாக இருக்கும் என ஆய்வு நிறுவனம் தெரிவித்துள்ளது.
ஐசிஐசிஐ வங்கி: இலக்கு ரூ.1,800. கடன் வளர்ச்சி மற்றும் வைப்பு வளர்ச்சி தொடர்ந்து வலுவாக இருக்கும் என்றும், சொத்து தரம் மற்றும் கடன் செலவுகள் கட்டுப்பாட்டில் இருக்கும் என்றும் எதிர்பார்க்கப்படுகிறது.
ஐடிசி: இலக்கு ரூ.440. சமீபத்திய வரி உயர்வால் சிகரெட் விற்பனை அளவில் பாதிப்பு ஏற்பட்டாலும், முன்னணி பிராண்டுகளில் படிப்படியாக விலையை உயர்த்துவதன் மூலம் அதன் தாக்கத்தை ஈடுகட்ட முடியும் என 360 ஒன் கேபிடல் கூறியுள்ளது.
என்டிபிசி: இலக்கு ரூ.455. மின்சாரத்துக்கான தேவை அதிகரிப்பது மற்றும் நிலக்கரி அடிப்படையிலான மின் நிலையங்களின் பயன்பாட்டு விகிதம் மேம்படுவது மின் உற்பத்தி மற்றும் விற்பனையை அதிகரிக்க உதவும் என தெரிவிக்கப்பட்டுள்ளது.
அரவிந்தோ பார்மா: இலக்கு ரூ.1,840. அமெரிக்க சந்தையில் வருவாய் வளர்ச்சி, புதிய தயாரிப்புகள் மற்றும் எபிட்டா லாப விகிதம் 23–24 சதவீதத்துக்கு மேல் இருக்கும் என்ற எதிர்பார்ப்பு ஆகியவை வளர்ச்சிக்கு ஆதரவாக உள்ளன.
எஸ்பிஐ லைஃப் இன்சூரன்ஸ்: இலக்கு ரூ.2,380. சில்லறை புதிய பிரீமியம் வளர்ச்சி, முகவர் விற்பனை மற்றும் புதிய காப்பீட்டுத் தயாரிப்புகள் மூலம் நடுத்தர இரட்டை இலக்க வளர்ச்சி கிடைக்கும் என எதிர்பார்க்கப்படுகிறது.
சுப்ரீம் இண்டஸ்ட்ரீஸ்: இலக்கு ரூ.4,661. விற்பனை அளவு அதிகரிப்பு, பிளம்பிங் பொருட்களுக்கான தேவை, கிராமப்புற மற்றும் உள்கட்டமைப்பு துறை மீட்சி ஆகியவை சாதகமான காரணிகளாகக் கூறப்பட்டுள்ளன.
ஜிண்டால் சா: இலக்கு ரூ.423. உற்பத்தித் திறன் பயன்பாடு அதிகரிப்பு, வலுவான ஆர்டர் நிலவரம், அமெரிக்க பூச்சு உற்பத்தித் திறன் விரிவாக்கம் மற்றும் புதிய திட்ட ஆர்டர்கள் ஆகியவை வளர்ச்சிக்கு உதவும் என 360 ஒன் கேபிடல் ரிசர்ச் தெரிவித்துள்ளது.