காங்கோ ஜனநாயக குடியரசில் தொடங்கிய எபோலா பரவல், தற்போது நைஜீரியாவையும் எட்டியுள்ளது. உகாண்டாவிலிருந்து தலைநகர் அபுஜா வந்த பெண்ணுக்குத் தொற்று உறுதிசெய்யப்பட்டுள்ளது.
கடந்த 7-ம் தேதி அறிகுறிகள் தென்பட்டபோது, முதலில் மலேரியா எனக் கருதப்பட்டது. பின்னர் நடத்தப்பட்ட பரிசோதனையில் எபோலா கண்டறியப்பட்டது. அவருடன் தொடர்பிலிருந்த மருத்துவப் பணியாளர்கள், கணவர் உள்ளிட்ட 44 பேரை அதிகாரிகள் கண்காணித்து வருகின்றனர். விமானப் பயணிகளையும் அடையாளம் காணும் பணி நடைபெறுகிறது.மத்திய ஆப்பிரிக்காவில் தொடங்கிய இந்தப் பரவல், கிழக்கு ஆப்பிரிக்காவைத் தொடர்ந்து மேற்கு ஆப்பிரிக்காவையும் எட்டியிருப்பது கவலையை அதிகரித்துள்ளது. நோயைக் கண்டறிவதில் ஏற்படும் தாமதம் தடுப்பு நடவடிக்கைகளுக்குச் சவாலாகியுள்ளது. இந்தப் பரவலுக்குக் காரணமான பண்டிபுக்யோ வகை வைரஸுக்கு அங்கீகரிக்கப்பட்ட தடுப்பூசியோ, குறிப்பிட்ட சிகிச்சையோ இல்லை. தொடர்புகளைக் கண்டறிந்து, பாதிக்கப்பட்டவர்களை விரைவாகத் தனிமைப்படுத்தும் பணிகளை நாடுகள் தீவிரப்படுத்தியுள்ளன.
