நீர்மூழ்கிக் கப்பலில் இருந்து வடகொரியா ஏவுகணை சோதனை

வடகொரிய தலைவர் கிம் ஜாங் உன்னைச் சந்திக்க வாய்ப்புள்ளதாக அமெரிக்க அதிபர் டொனால்டு ட்ரம்ப் தெரிவித்துள்ள நிலையில், நீர்மூழ்கிக் கப்பலிலிருந்து ஏவக்கூடிய இருவகை குரூஸ் ஏவுகணைகளைச் சோதித்துள்ளதாக வடகொரியா அறிவித்துள்ளது. கடற்படையின் போர்த்திறனை மேம்படுத்தும் நோக்கில் இந்தச் சோதனை நடத்தப்பட்டதாக அந்நாடு தெரிவித்துள்ளது.

ஏவுகணைகள் நீர்மூழ்கிக் கப்பலிலிருந்து ஏவப்பட்டதைத் தென்கொரிய ராணுவமும் கண்டறிந்துள்ளது. ஒரு ஏவுகணை செங்குத்து ஏவுகுழாயிலிருந்தும், மற்றொன்று நீர்மூழ்கிக் குண்டுகளை ஏவும் குழாயிலிருந்தும் செலுத்தப்பட்டதாக அது தெரிவித்துள்ளது. இருப்பினும், ஏவுகணைகளை ஏவ பயன்படுத்தப்பட்ட நீர்மூழ்கிக் கப்பலின் பெயரை வடகொரியா அதிகாரபூர்வமாக வெளியிடவில்லை.

அடுத்த மாதம் மேற்கொள்ளவுள்ள ஆசியப் பயணத்தின்போது கிம் ஜாங் உன்னைச் சந்திக்கக்கூடும் என டிரம்ப் அண்மையில் தெரிவித்திருந்தார். சீனாவின் ஷென்சென் நகரில் நடைபெறவுள்ள ஆசிய–பசிபிக் பொருளாதார ஒத்துழைப்பு மாநாட்டையொட்டி, சீன அதிபர் ஜி ஜின்பிங்கையும் அவர் சந்திக்கவுள்ளார். எனினும், டிரம்ப்–கிம் சந்திப்பு உறுதி செய்யப்படவில்லை.

அமெரிக்காவுடனான பேச்சுவார்த்தையை மீண்டும் தொடங்குவதற்கான முயற்சிகள் நடைபெறும் சூழலில், வடகொரியா தொடர்ந்து ஆயுதச் சோதனைகளை நடத்தி வருகிறது. சில நாட்களுக்கு முன்பும் கிழக்குக் கடற்பகுதியை நோக்கிப் பல பாலிஸ்டிக் ஏவுகணைகளைச் செலுத்தியது. இந்த ஆண்டில் நடத்தப்பட்ட ஏவுகணைச் சோதனைகளின் எண்ணிக்கை, கடந்த ஆண்டின் மொத்த எண்ணிக்கையை ஏற்கெனவே கடந்துள்ளதாக தகவல் வெளியாகியுள்ளது.

வடகொரியாவை அணுஆயுத நாடாக அமெரிக்கா அங்கீகரிக்க வேண்டும் என்று கிம் வலியுறுத்தி வருகிறார். தென்கொரியாவுடனான உறவை மேம்படுத்தும் முயற்சிகளுக்கும் அவர் சாதகமாகப் பதிலளிக்கவில்லை. கடற்படையை வலுப்படுத்தும் திட்டங்களைச் செயல்படுத்தப்போவதாக கடந்த செப்டம்பரில் அறிவித்த கிம், எட்டு மாதங்களில் அதன் பலனை உலகுக்குக் காட்டுவதாகவும் கூறியிருந்தார்.