ஏமனின் ஏடன் சர்வதேச விமான நிலையத்தில் இரு ஏவுகணைகள் விழுந்து வெடித்ததில், எகிப்துக்குப் புறப்படத் தயாராக இருந்த விமானத்தில் பயணித்த 151 பயணிகள் உயிர் தப்பினர். விமானத்திலிருந்து சுமார் 500 மீட்டர் தொலைவில் ஏவுகணைகள் விழுந்ததாக அதிகாரிகள் தெரிவித்தனர்.
ஏமனின் தெற்குப் பகுதியில் உள்ள துறைமுக நகரமான ஏடனில், கடந்த வெள்ளிக்கிழமை இரவு இந்தத் தாக்குதல் நடந்தது. இதற்கு ஈரான் ஆதரவு ஹவுத்தி அமைப்பினரே காரணம் என்று ஏமன் அரசு குற்றம்சாட்டியுள்ளது.ஏமனியா ஏர்வேஸ் நிறுவனத்தின் ஐஒய் 612 விமானம், எகிப்து தலைநகர் கெய்ரோவுக்குச் செல்லத் தயாராக இருந்தது. அப்போது விமான நிலைய வளாகத்துக்குள் ஏவுகணைகள் விழுந்ததால், பயணிகள் விமானத்திலிருந்து பாதுகாப்பாக வெளியேற்றப்பட்டனர். உயிரிழப்போ, காயமோ ஏற்படவில்லை எனத் தெரிவிக்கப்பட்டுள்ளது.
இதுகுறித்து ஏமன் தகவல் துறை அமைச்சர் மொவம்மர் அல் எர்யானி கூறுகையில், விமானத்திலிருந்து சுமார் 500 மீட்டர் தொலைவிலும், ஓடுபாதையின் மையப் பகுதியிலிருந்து சுமார் 100 மீட்டர் தொலைவிலும் ஏவுகணைகள் விழுந்ததாகத் தெரிவித்தார்.
பயணிகள் மற்றும் விமான ஊழியர்கள் அனைவரும் பாதுகாப்பாக இருப்பதாகவும் அவர் கூறினார். பொதுமக்கள் பயன்படுத்தும் விமான நிலையத்தின் மீதான தாக்குதல், பயணிகளின் உயிருக்கும் விமானப் போக்குவரத்துப் பாதுகாப்புக்கும் நேரடி அச்சுறுத்தல் என்றும், சர்வதேசச் சட்டங்களை மீறும் செயல் என்றும் அவர் கண்டனம் தெரிவித்தார்.
இதனிடையே, விமான நிலையத்துக்கு அருகிலுள்ள ராணுவ முகாமையே குறிவைத்ததாக ஹவுத்தி தரப்பு தெரிவித்துள்ளது. சவுதி தலைமையிலான படைகளின் கட்டளை மையம் மற்றும் ஆயுதக் கிடங்கு மீது தாக்குதல் நடத்தியதாக அந்த அமைப்பின் ராணுவ வட்டாரம் கூறியுள்ளது.
ஏடன் விமான நிலையம் கடந்த 10 நாட்களுக்குள் இரண்டாவது முறையாக ஏவுகணைத் தாக்குதலுக்கு உள்ளாகியுள்ளது. முன்னதாக, அக்டோபர் 7-ம் தேதியும் அங்கு இரு ஏவுகணைகள் வீசப்பட்டன. அந்தச் சம்பவத்திலும் உயிர்ச்சேதம் ஏற்படவில்லை என்று அதிகாரிகள் தெரிவித்திருந்தனர்.
விமான நிலையத் தாக்குதலுக்கு முந்தைய நாளான வியாழக்கிழமை, ஏடனில் உள்ள அதிபர் மாளிகை வளாகத்தின் மீது நடத்தப்பட்ட தாக்குதலில் குறைந்தது ஐந்து பேர் உயிரிழந்தனர். சவுதி ஆதரவு பெற்ற, சர்வதேச அங்கீகாரமுள்ள ஏமன் அரசுக்கும் ஹவுத்தி படைகளுக்கும் இடையே மோதல் தீவிரமடைந்துள்ள நிலையில், அடுத்தடுத்து இந்தத் தாக்குதல்கள் நடந்துள்ளன.
