ரிசர்வ் வங்கியின் வட்டி விகிதக் குறைப்புக்கு தற்போதைக்கு எவ்வித வாய்ப்பும் இல்லை என்றும், பணவீக்கம் மற்றும் உள்நாட்டுப் பொருளாதார வளர்ச்சியின் அடிப்படையிலேயே அடுத்தகட்ட முடிவுகள் அமையும் என்றும் இந்திய ரிசர்வ் வங்கி (ஆர்பிஐ) ஆளுநர் சஞ்சய் மல்ஹோத்ரா தெரிவித்துள்ளார்.
அண்மையில் நடைபெற்ற நாணயக் கொள்கைக் குழுவின் கூட்டறிக்கைகள் வெளியாகியுள்ள நிலையில், இந்த தகவல் உறுதிப்படுத்தப்பட்டுள்ளது.அக்டோபர் 5 முதல் 7-ம் தேதி வரை நடைபெற்ற நாணயக் கொள்கைக் குழுக் கூட்டத்தில், ரெப்போ வட்டி விகிதத்தை 0.25 சதவீதம் உயர்த்த குழு ஒருமனதாக முடிவெடுத்துள்ளது. இதன் மூலம் தற்போதைய ரெப்போ விகிதம் 5.50 சதவீதமாக அதிகரித்துள்ளது. சுமார் 4 ஆண்டுகளுக்குப் பிறகு ரிசர்வ் வங்கி வட்டி விகிதத்தை உயர்த்தியிருப்பது இதுவே முதல்முறையாகும்.
விலைவாசி உயர்வை தீவிரமாகக் கட்டுப்படுத்தும் நோக்கில், ரிசர்வ் வங்கி தனது நாணயக் கொள்கை நிலைப்பாட்டை "சீரமைக்கப்பட்ட நாணய இறுக்க நிலைக்கு" மாற்றியுள்ளது. இனி வரும் காலங்களில் வட்டி விகிதங்களை அதிகரிப்பது அல்லது தற்போதைய நிலையிலேயே தொடர்வது ஆகிய இரண்டு நடவடிக்கைகள் மட்டுமே பரிசீலிக்கப்படும் எனத் தெரிவிக்கப்பட்டுள்ளது.
மேலும் அந்த அறிக்கையில், அத்தியாவசியப் பொருட்களின் விலை உயர்வு பரவலாகி வருவது குறித்து ஆளுநர் சஞ்சய் மல்ஹோத்ரா கவலை தெரிவித்துள்ளார். கடந்த மார்ச் மாதத்தில் 20 சதவீதமாக இருந்த நுகர்வோர் விலைக் குறியீட்டு பணவீக்கம், ஆகஸ்ட் மாதத்தில் 37 சதவீதமாக அதிகரித்துள்ளது. மேலும், ஜூலை மாதத்தில் 3.9 சதவீதமாக இருந்த அடிப்படை பணவீக்கம் , ஆகஸ்ட் மாதத்தில் 4.2 சதவீதமாக உயர்ந்துள்ளது. நடப்பு நிதியாண்டில் சில்லறை பணவீக்கம் சராசரியாக 5.2 சதவீதமாக இருக்கும் எனவும், நடப்பு அக்டோபர் - டிசம்பர் காலாண்டில் இது 6 சதவீதத்தை எட்டக்கூடும் எனவும் ரிசர்வ் வங்கி கணித்துள்ளது.
அமெரிக்க மத்திய வங்கியின் வட்டி விகித உயர்வு மற்றும் சர்வதேச சந்தையில் கச்சா எண்ணெய் விலை பீப்பாய்க்கு 100 டாலராக உயர்ந்துள்ளது போன்ற உலகளாவிய பொருளாதார சவால்கள் நிலவுகின்றன. இருப்பினும், இந்தியாவின் பொருளாதார வளர்ச்சி 2026-27-ம் நிதியாண்டில் 7.1 சதவீதமாக வலுவாகவே இருக்கும் என மதிப்பிடப்பட்டுள்ளது.
ரெப்போ விகிதம் 0.25 சதவீதம் உயர்த்தப்பட்டுள்ளதால், வங்கிகளில் பெறப்படும் வீட்டுக் கடன், வாகனக் கடன் மற்றும் கார்ப்பரேட் கடன்களுக்கான வட்டி விகிதங்கள் உடனடியாக அதிகரிக்க வாய்ப்புள்ளது. மேலும் "வட்டி விகித குறைப்பு தற்போதைக்கு இல்லை" என ஆர்பிஐ அறிவித்துள்ளதால், பொதுமக்களும், சந்தை முதலீட்டாளர்களும் நீண்ட காலத்துக்கு அதிக வட்டி விகிதங்களை எதிர்கொள்ளத் தயாராக இருக்க வேண்டும் என்று பொருளாதார வல்லுநர்கள் எச்சரித்துள்ளனர்.
