அமெரிக்க டாலருக்கு நிகரான இந்திய ரூபாயின் மதிப்பு தொடர்ந்து 5-வது நாளாக நேற்றும் ஏற்றம் கண்டது. நேற்றைய வர்த்தக நேர முடிவில் ரூபாயின் மதிப்பு 12 காசுகள் உயர்ந்து 95.05-ஆக இருந்தது.
இந்திய ரிசர்வ் வங்கியின் தொடர்ச்சியான அந்நியச் செலாவணி சந்தை தலையீடுகள் இந்த உயர்வுக்கு முக்கியக் காரணமாக அமைந்தன. வங்கிகளுக்கு இடையேயான அந்நியச் செலாவணி சந்தையில் நேற்று டாலருக்கு நிகரான ரூபாயின் மதிப்பு 94.95 ஆகதொடங்கியது. வர்த்தகத்தின் இடையே அதிகபட்சமாக 94.86 வரையிலும், குறைந்தபட்சமாக 95.11 வரையிலும் சென்ற ரூபாய் மதிப்பு இறுதியில் முந்தைய தினத்தைவிட 12 காசுகள் அதிகரித்து, 95.05-ல் நிறைவடைந்தது.
முன்னதாக, புதன்கிழமையும் ரூபாய் மதிப்பு 19 காசுகள் உயர்ந்து 95.17-ஆக முடிவடைந்திருந்தது. ஒட்டுமொத்தமாக கடந்த 5 நாட்களில் மட்டும் ரூபாயின் மதிப்பு ரூ.1.83 வரை அதிகரித்துள்ளது குறிப்பிடத்தக்கது.
ரிசர்வ் வங்கியின் நடவடிக்கைகள் ஒருபுறம் இருந்தாலும், டாலரில் முதலீடு செய்திருந்தவர்கள் லாப நோக்கில் முதலீடுகளைத் திரும்பப் பெற்றதும் ரூபாயின் மதிப்பு உயர முக்கியக் காரணம் என பொருளாதார நிபுணர்கள் தெரிவித்தனர்.
மேலும், சர்வதேச சந்தையில் டாலரின் மதிப்பு சரிந்ததும், கச்சா எண்ணெய் விலை .82 சதவீதம் குறைந்து பீப்பாய் 104.13 டாலராகப் பதிவானதும் சாதகமாக அமைந்தது. உள்நாட்டுப் பங்குச் சந்தைகளில் காணப்பட்ட அபரிமிதமான எழுச்சியும் முதலீட்டாளர்களின் நம்பிக்கையை அதிகரித்தது.
ரூபாயின் மதிப்பு தொடர்ந்து உயர்ந்து வந்தாலும், அதிகரித்து வரும் வர்த்தகப் பற்றாக்குறை மற்றும் இறக்குமதியாளர்களிடையே டாலருக்கான தேவை தொடர்ந்து வலுவாக இருப்பது போன்றவை இந்த உயர்வை சற்றே மட்டுப்படுத்தின. உலகளாவிய பொருளாதார நெருக்கடிகள் வரும் நாட்களில் ரூபாயின் அபரிமிதமான ஏற்றத்தைத் தடுக்கக் கூடும் என நிபுணர்கள் எச்சரிக்கின்றனர்.
கடந்த புதன்கிழமை அந்நிய நிறுவன முதலீட்டாளர்கள் இந்தியப் பங்குச் சந்தையில் இருந்து ரூ.1,857.44 கோடி மதிப்பிலான பங்குகளை விற்று, முதலீடுகளைத் திரும்பப் பெற்றுள்ளனர் என சந்தை புள்ளி விவரங்கள் தெரிவிக்கின்றன.
இன்ஃபோகிராபிக்ஸ் தரவுகள் ...
அமெரிக்க டாலருக்கு நிகரான ரூபாய் மதிப்பு: ரூ 95.05
நேற்றைய ஏற்றம்: 12 காசுகள்
புதன்கிழமை மதிப்பு: ரூ 95.17
5 நாட்களில் ஒட்டுமொத்த ஏற்றம்: ரூ1.83
