பெங்களூரு:
விமான உதிரிபாகங்கள் தயாரிக்கும் ஏக்வஸ் லிமிடெட் நிறுவனம், 2026-27 நிதியாண்டில் வருவாய் 45 முதல் 50 சதவீதம் வரை அதிகரிக்கும் என இலக்கு நிர்ணயித்துள்ளது. நிறுவனத்தின் விமானத் துறை ஆர்டர் மதிப்பு ரூ.9,500 கோடியாக உள்ளது.கர்நாடகத்தின் பெலகாவியில் உற்பத்தி மையத்தைக் கொண்டுள்ள ஏக்வஸ், விமானத் துறைக்குத் தேவையான துல்லியமான உதிரிபாகங்களை தயாரித்து வருகிறது. ஏர்பஸ் உள்ளிட்ட சர்வதேச விமானத் தயாரிப்பு நிறுவனங்களின் விநியோகச் சங்கிலியிலும் இந்நிறுவனம் இடம்பெற்றுள்ளது. 2026-27 நிதியாண்டின் முதல் காலாண்டில் நிறுவனத்தின் செயல்பாட்டு வருவாய் ரூ.395.5 கோடியாக இருந்தது. கடந்த ஆண்டு இதே காலாண்டில் ரூ.255.6 கோடியாக இருந்த நிலையில், வருவாய் 55 சதவீதம் அதிகரித்துள்ளது. ஆனால், நிகர இழப்பு ரூ.53.2 கோடியாக இருந்தது.
முதல் காலாண்டில் விமானத் துறை வருவாய் ரூ.322.2 கோடியாக இருந்தது. இது நிறுவனத்தின் மொத்த வருவாயில் 81 சதவீதமாகும். இந்தப் பிரிவு ஆண்டுக்கு ஆண்டு அடிப்படையில் 40 சதவீத வளர்ச்சியைப் பதிவு செய்துள்ளது. சஃப்ரான் லேண்டிங் சிஸ்டம்ஸ் நிறுவனத்துடன் ஏர்பஸ் ஏ320 விமானங்களுக்கான முழுமையான சக்கரங்களைத் தயாரிக்கும் 15 ஆண்டு ஒப்பந்தத்தையும் ஏக்வஸ் மேற்கொண்டுள்ளது. பெலகாவி ஆலையில் இந்த உற்பத்தி நடைபெற உள்ளது.
2026-27 நிதியாண்டில் விமானத் துறை வருவாய் 25 முதல் 30 சதவீதமும், நுகர்வோர் பொருட்கள் பிரிவு வருவாய் 125 முதல் 150 சதவீதமும் அதிகரிக்கும் என நிறுவனம் எதிர்பார்க்கிறது.
மேலும், நடப்பு நிதியாண்டில் சுமார் ரூ.660 கோடி மூலதனச் செலவு செய்ய நிறுவனம் திட்டமிட்டுள்ளது. ஹோசூர் ஆலையில் அடுத்த 10 ஆண்டுகளில் ரூ.1,900 கோடி முதலீடு செய்யவும் திட்டமிடப்பட்டுள்ளது. விமானத் துறையில் அதிகரித்து வரும் தேவை மற்றும் பெரிய அளவிலான ஆர்டர் கையிருப்பு காரணமாக நிறுவனத்தின் உற்பத்தித் திறனை விரிவுபடுத்தும் நடவடிக்கைகள் தொடர்ந்து நடைபெற்று வருகின்றன.
