உக்ரைனுக்கு உதவும் செயற்கைக்கோள் வலையமைப்புடன் தொடர்புடைய அமெரிக்கப் பதிவுபெற்ற வணிக ரேடார் செயற்கைக்கோளை, ரஷ்யாவின் ராணுவச் செயற்கைக்கோள் மிக நெருக்கமாக நெருங்கிச் சென்றுள்ளது. இந்த நகர்வு விண்வெளிப் பாதுகாப்பு தொடர்பான கவலைகளை அதிகரித்துள்ளது.
ரஷ்யாவின் ‘காஸ்மோஸ் 2612’ என்ற ராணுவச் செயற்கைக்கோள், அமெரிக்காவில் பதிவுசெய்யப்பட்ட ‘ICEYE-X36’ என்ற வணிக ரேடார் செயற்கைக்கோளை நெருங்கிச் சென்றதாக விண்வெளிக் கண்காணிப்பு நிறுவனமான லியோலேப்ஸ் தெரிவித்துள்ளது.
கடந்த 17-ம் தேதி இரு செயற்கைக்கோள்களுக்கும் இடையிலான தூரம் சுமார் 5 கிலோமீட்டராகக் குறைந்திருந்தது. கடந்த 18-ம் தேதி அன்று, அவை சில நூறு மீட்டர் இடைவெளியில் வந்திருக்கலாம் எனத் தனியார் நிறுவன கண்காணிப்பாளர்கள் தெரிவித்தனர்.
ICEYE நிறுவனம் வழங்கிய ரேடார் படங்கள் உக்ரைனின் ராணுவ நடவடிக்கைகளுக்கு உதவியுள்ளன. இருப்பினும், குறிப்பிட்ட ICEYE-X36 செயற்கைக்கோள் உக்ரைனுக்கு நேரடியாக உதவுகிறதா என்பது உறுதிப்படுத்தப்படவில்லை.
ரஷ்யாவின் இந்த நகர்வு திட்டமிட்ட கண்காணிப்பாக இருக்கலாம் என நிபுணர்கள் சந்தேகிக்கின்றனர். ஆனால், செயற்கைக்கோளைச் சேதப்படுத்தும் நோக்கம் இருந்ததற்கான உறுதியான ஆதாரம் இதுவரை வெளியாகவில்லை.
