புதிய பரிணாமம்! சுற்றுலாத் துறையில் ஆதிக்கம் செலுத்தும் ஏஐ! என்ன ஸ்பெஷல்?

சென்னை:

தமிழக சுற்றுலாத் துறையில் செயற்கை நுண்ணறிவு (AI) மற்றும் டிஜிட்டல் தொழில்நுட்பத்தைப் பயன்படுத்தும் முயற்சிகள் தொடங்கியுள்ளன. சுற்றுலாப் பயணிகளுக்கு தனிப்பயனாக்கப்பட்ட தகவல்கள் (Customized information) , பயணத் திட்டங்கள் மற்றும் புதிய சுற்றுலா அனுபவங்களை வழங்குவதுடன், அதிகம் அறியப்படாத சுற்றுலாத் தலங்களை பிரபலப்படுத்துவதற்கும் இந்தத் தொழில்நுட்பம் பயன்படுத்தப்பட உள்ளது.

உலக சுற்றுலா தினத்தையொட்டி செப்டம்பர் 27-ஆம் தேதி கோவையில் நடைபெற்ற நிகழ்ச்சியில் டிஜிட்டல் தொழில்நுட்பம் மற்றும் ஏஐ அடிப்படையிலான சுற்றுலா முயற்சிகள் அறிமுகப்படுத்தப்பட்டன. சுற்றுலா அனுபவத்தை தொழில்நுட்பத்தின் மூலம் மேம்படுத்துவதே இதன் முக்கிய நோக்கமாக தெரிவிக்கப்பட்டுள்ளது.

இதுகுறித்து துறை சார்ந்த வல்லுநர் கூறியதாவது:

ஏஐ மூலம் பயணிகள் தங்களின் விருப்பம், நேரம் மற்றும் செல்ல விரும்பும் இடங்களுக்கு ஏற்ப பயணத் திட்டத்தை உருவாக்க முடியும். வானிலை, சுற்றுலா இடங்கள், நகரத் தகவல்கள் உள்ளிட்ட விவரங்களையும் டிஜிட்டல் தளங்கள் மூலம் பெறுவதற்கான வாய்ப்புகள் உள்ளன.

தமிழகத்தில் கோயில்கள், பாரம்பரிய கட்டிடங்கள், தொல்லியல் தளங்கள், அருங்காட்சியகங்கள், கடற்கரைகள், மலைப் பகுதிகள் மற்றும் கைவினைக் கலைகள் என பல்வேறு சுற்றுலா தளங்கள் உள்ளன. இவற்றை பயணிகளின் விருப்பத்துக்கு ஏற்ப பரிந்துரைப்பதன் மூலம் குறைவாக அறியப்பட்ட இடங்களுக்கும் சுற்றுலாப் பயணிகளை ஈர்க்க முடியும்.

இந்திய அளவிலும் சுற்றுலாவில் டிஜிட்டல் தொழில்நுட்பத்தைப் பயன்படுத்தும் நடவடிக்கைகள் மேற்கொள்ளப்பட்டு வருகின்றன. மத்திய சுற்றுலா அமைச்சகம் தேசிய டிஜிட்டல் சுற்றுலா திட்டம் (National Digital Tourism Stack) மூலம் சுற்றுலா சேவைகளை எளிதில் கண்டறிந்து பயன்படுத்தும் வகையில் டிஜிட்டல் கட்டமைப்பை உருவாக்கி வருகிறது.

மேலும், வியத்தகு இந்தியா (Incredible India) டிஜிட்டல் தளத்தில் ஏஐ அடிப்படையிலான வசதிகள் அறிமுகப்படுத்தப்பட்டுள்ளன. பாரம்பரியம், கலாசாரம், உணவு, கைவினை மற்றும் கிராமப்புற சுற்றுலா உள்ளிட்ட பல்வேறு அனுபவங்களை டிஜிட்டல் முறையில் பயணிகளிடம் கொண்டு செல்லும் முயற்சிகளும் நடைபெற்று வருகின்றன.

ஏஐ பயன்பாடு அதிகரிக்கும் நிலையில், கோயில்கள், வரலாற்றுச் சின்னங்கள் மற்றும் உள்ளூர் கலாசாரம் குறித்த தகவல்கள் துல்லியமாக வழங்கப்படுவதை உறுதி செய்ய வேண்டும். பயணிகளின் தனிப்பட்ட தகவல்களின் பாதுகாப்பும் முக்கியமானதாகும்.

மேலும், ஏஐ தொழில்நுட்பம் சுற்றுலா வழிகாட்டிகள், உள்ளூர் கலைஞர்கள் மற்றும் கைவினைஞர்களுக்கு மாற்றாக இல்லாமல், அவர்களுக்கு உதவும் கருவியாக பயன்படுத்தப்பட வேண்டியது அவசியம்.

ஏஐ தொழில்நுட்பம் தமிழக சுற்றுலாவுக்கு புதிய வாய்ப்புகளை உருவாக்கும் நிலையில், அதன் வெற்றியை தொழில்நுட்ப பயன்பாட்டால் மட்டும் அளவிட முடியாது. சுற்றுலாப் பயணிகளின் எண்ணிக்கை, தங்கும் காலம், உள்ளூர் மக்களின் வருமானம் மற்றும் புதிய சுற்றுலாத் தலங்களுக்கு கிடைக்கும் வருகை ஆகியவற்றின் அடிப்படையில் அதன் தாக்கம் மதிப்பிடப்பட வேண்டும் என அவர் தெரிவித்தார்.