இத்தாலியைச் சேர்ந்த லாரி தயாரிப்பு நிறுவனமான இவெகோவை வாங்குவதற்கான விலையை டாடா மோட்டார்ஸ் உயர்த்தியுள்ளது. ஒரு பங்குக்கு முன்பு அறிவித்த 14.10 யூரோவுக்குப் பதிலாக 14.40 யூரோ வழங்க முடிவு செய்துள்ளது. தேவையான அனுமதிகள் கிடைப்பதில் தாமதம் ஏற்பட்டதால் இந்த முடிவு எடுக்கப்பட்டுள்ளது.
இவெகோவின் பாதுகாப்புத் துறை வர்த்தகத்தைத் தவிர்த்து, மற்ற வர்த்தகங்களை வாங்கப்போவதாக டாடா மோட்டார்ஸ் கடந்த ஆண்டு அறிவித்தது. அப்போது இந்த ஒப்பந்தத்தின் மதிப்பு சுமார் ரூ.38,240 கோடியாகக் குறிப்பிடப்பட்டது. டிஎம்எல் சிவி ஹோல்டிங்ஸ் நிறுவனம் மூலம் இந்த நடவடிக்கை மேற்கொள்ளப்படுகிறது.இவெகோ பங்குதாரர்களிடமிருந்து அனைத்து சாதாரணப் பங்குகளையும் பணம் கொடுத்து வாங்கும் நடவடிக்கையை டாடா மோட்டார்ஸ் செப்டம்பரில் தொடங்கியது. பங்குதாரர்கள் தங்களது பங்குகளை விற்க ஒப்புக்கொள்வதற்கான காலம் செப்டம்பர் 7 முதல் அக்டோபர் 26 வரை நிர்ணயிக்கப்பட்டுள்ளது.
இதுதொடர்பான தீர்மானங்கள் மீது அக்டோபர் 16 அன்று நடைபெறும் சிறப்புப் பொதுக்கூட்டத்தில் பங்குதாரர்கள் வாக்களிக்க உள்ளனர். இந்த ஒப்பந்தத்துக்கு இவெகோ இயக்குநர் குழு ஒருமனதாக ஆதரவு தெரிவித்துள்ளது. பங்குகளை விற்கவும், தீர்மானங்களுக்கு ஆதரவாக வாக்களிக்கவும் பங்குதாரர்களுக்கு அது பரிந்துரைத்துள்ளது.
முன்பு அறிவிக்கப்பட்ட விலையே இவெகோவுக்கு நியாயமான மதிப்பை வழங்குவதாக டாடா மோட்டார்ஸ் தெரிவித்துள்ளது. இருப்பினும், அனுமதி பெறும் பணிகள் எதிர்பார்த்ததைவிட அதிக நேரம் எடுத்துக்கொள்வதால், ஒப்பந்தத்தை முடிப்பதில் சிறிய தாமதம் ஏற்பட்டுள்ளது. இதைக் கருத்தில்கொண்டு விலையை உயர்த்தியுள்ளதாக நிறுவனம் கடந்த வெள்ளிக்கிழமை இரவு பங்குச் சந்தைக்குத் தெரிவித்தது.
இவெகோவின் 27.12 கோடி சாதாரணப் பங்குகளையும் பங்குதாரர்கள் விற்றால், ஒப்பந்தத்தின் மொத்த மதிப்பு 3.91 பில்லியன் யூரோவாக இருக்கும். முந்தைய விலையின்படி இந்த மதிப்பு 3.82 பில்லியன் யூரோவாக இருந்தது. விலை உயர்வால் ஏற்படும் கூடுதல் செலவைச் சமாளிக்க, எம்யூஎஃப்ஜி வங்கியின் கிஃப்ட் கிளையுடன் 8.5 கோடி யூரோ கடன் வசதி ஒப்பந்தத்தை டாடா மோட்டார்ஸ் மேற்கொண்டுள்ளது.
தற்போது அறிவிக்கப்பட்டுள்ள பங்கு ஒன்றுக்கு 14.40 யூரோ என்ற விலை மேலும் உயர்த்தப்படாது என்றும் நிறுவனம் தெளிவுபடுத்தியுள்ளது. இதனால், பங்குகளை விற்க ஒப்புக்கொள்ளும் இவெகோ பங்குதாரர்களுக்கு, முந்தைய அறிவிப்பைவிட ஒவ்வொரு பங்குக்கும் 0.30 யூரோ கூடுதலாகக் கிடைக்கும். திருத்தப்பட்ட சலுகை விலையை டாடா மோட்டார்ஸ் தனது பங்குச் சந்தை அறிக்கையில் உறுதிப்படுத்தியுள்ளது.
