கச்சா எண்ணெய் விலை உயர்வு, வெளிநாட்டு முதலீட்டாளர்களின் தொடர்ச்சியான பங்கு விற்பனை, வட்டி உயர்வு குறித்த அச்சம் ஆகியவற்றால் இந்தியப் பங்குச் சந்தைகள் நேற்று சரிந்தன. சென்செக்ஸ் 548 புள்ளிகள் வீழ்ந்து, 72,000 புள்ளிகளுக்குக் கீழே முடிவடைந்தது.
காலையில் உயர்வுடன் தொடங்கிய மும்பை பங்குச் சந்தையின் சென்செக்ஸ், பின்னர் 547.65 புள்ளிகள் (0.76 சதவீதம்) சரிந்து 71,924.68 புள்ளிகளில் நிலைபெற்றது. வர்த்தகத்தின்போது அதிகபட்சமாக 796.23 புள்ளிகள் குறைந்து 71,676.10 புள்ளிகளைத் தொட்டது.
தேசியப் பங்குச் சந்தையின் நிஃப்டி 157.10 புள்ளிகள் (0.70 சதவீதம்) குறைந்து 22,363.35 புள்ளிகளில் முடிவடைந்தது.
சென்செக்ஸ் பட்டியலில் ஐடிசி பங்கு அதிகபட்சமாக 3.23 சதவீதம் சரிந்தது. டெக் மகிந்திரா, இந்துஸ்தான் யூனிலீவர், லார்சன் அண்ட் டூப்ரோ, பாரத ஸ்டேட் வங்கி, டாடா கன்சல்டன்சி சர்வீசஸ் பங்குகளும் வீழ்ச்சியடைந்தன. பாரத் எலக்ட்ரானிக்ஸ், மகிந்திரா அண்ட் மகிந்திரா, கோட்டக் மகிந்திரா வங்கி, எச்சிஎல் டெக் பங்குகள் உயர்ந்தன.
சர்வதேச சந்தையில் பிரெண்ட் கச்சா எண்ணெய் விலை 1.14 சதவீதம் உயர்ந்து, பீப்பாய்க்கு 105.8 அமெரிக்க டாலராக இருந்தது. வெளிநாட்டு நிறுவன முதலீட்டாளர்கள் கடந்த வெள்ளிக்கிழமை ரூ.3,568.90 கோடி மதிப்பிலான பங்குகளை விற்றதாகப் பங்குச் சந்தைத் தரவுகள் தெரிவித்தன.
பத்தாண்டு கால அரசுப் பத்திர வருவாய் மூன்றாண்டுகளில் இல்லாத உயர்வை எட்டியதும், வெளிநாட்டு நிதி வெளியேற்றமும் முதலீட்டாளர்களின் மனநிலையைப் பாதித்ததாக ஜியோஜித் இன்வெஸ்ட்மென்ட்ஸ் ஆராய்ச்சித் தலைவர் வினோத் நாயர் தெரிவித்தார்.
உபரி பணப்புழக்கத்தைக் கட்டுப்படுத்த ரிசர்வ் வங்கி தினசரி ரொக்கக் கையிருப்பு பராமரிப்புத் தேவையை உயர்த்தியதால் வங்கிப் பங்குகள் அழுத்தத்துக்குள்ளானதாகவும் அவர் கூறினார்.
இதனிடையே, வர்த்தகம் முடிந்த பிறகு வெளியான தரவுகளின்படி, செப்டம்பர் மாத சில்லறைப் பணவீக்கம் 5.54 சதவீதமாக உயர்ந்தது. உணவுப் பொருள்களின் விலையேற்றம் இதற்கு முக்கியக் காரணமாக அமைந்தது.
முன்னணி குறியீடுகள் சரிந்தபோதும், பிஎஸ்இ ஸ்மால்கேப் செலக்ட் குறியீடு 1.65 சதவீதமும், மிட்கேப் செலக்ட் குறியீடு 0.66 சதவீதமும் உயர்ந்தன.
அமெரிக்க டாலருக்கு எதிரான ரூபாய் மதிப்பு 93 காசுகள் உயர்ந்து 95.78 ஆகத் தற்காலிகமாக முடிவடைந்தது. ரூபாயை ஆதரிக்க ரிசர்வ் வங்கி மேற்கொண்ட நடவடிக்கைகள் இந்த உயர்வுக்கு உதவின.
துறைவாரியாக மருத்துவமனைகள், அன்றாட நுகர்பொருள்கள், பொதுத்துறை வங்கிகள், தகவல் தொழில்நுட்பப் பங்குகள் சரிந்தன. வீட்டுவசதி நிதி, மூலதனப் பொருள்கள், ரியல் எஸ்டேட், வாகனத் துறைகள் உயர்ந்தன.
ஆசியாவில் தென்கொரியாவின் கோஸ்பி 3.65 சதவீதம் சரிந்தது. ஷாங்காய் குறியீடும் குறைந்தது; ஹாங்காங் ஹாங்செங் சற்று உயர்ந்தது. ஐரோப்பியச் சந்தைகள் உயர்வுடன் வர்த்தகமாகின.
