மும்பை:
செப்டம்பர் மாதத்தில் நிஃப்டி 50 குறியீட்டில் இடம்பெற்ற 50 பங்குகளில் 45 பங்குகள் சரிவைச் சந்தித்தன. 5 பங்குகள் மட்டுமே ஏற்றம் கண்டன.
செப்டம்பரில் நிஃப்டி 6.1 சதவீதம் சரிந்து 22,620 புள்ளிகளில் முடிவடைந்தது. இது தொடர்ந்து 2-வது மாத சரிவாகும். ஒரே மாதத்தில் நிஃப்டி 1,460 புள்ளிகளை இழந்தது.
இந்த சரிவுக்கு மத்தியிலும் அதானி போர்ட்ஸ் 13 சதவீதம் உயர்ந்து, நிஃப்டி பங்குகளில் அதிக ஏற்றம் கண்டது. டாக்டர் ரெட்டீஸ் லேபரட்டரீஸ் 7 சதவீதமும், கோல் இந்தியா 6 சதவீதமும் உயர்ந்தன. ஐடிசி 3 சதவீதமும், அதானி என்டர்பிரைசஸ் 2 சதவீதமும் உயர்ந்தன.
மறுபுறம், டிசிஎஸ் பங்கு 15 சதவீதம் சரிந்து அதிக வீழ்ச்சியை சந்தித்தது. பஜாஜ் ஃபின்சர்வ் 14 சதவீதம் சரிந்தது. நெஸ்ட்லே இந்தியா, இன்ஃபோசிஸ் மற்றும் மாருதி சுஸுகி ஆகியவை தலா 12 சதவீதம் சரிந்தன.
துறைகள் அடிப்படையிலும் சரிவு பரவலாக இருந்தது. தகவல் தொழில்நுட்பத் துறை 11 சதவீதம் சரிந்து அதிக பாதிப்பைச் சந்தித்தது. வங்கி அல்லாத நிதிச் சேவைகள் மற்றும் ஆட்டோ துறைகள் தலா 9 சதவீதம் சரிந்தன. பொதுத்துறை வங்கிகள் 7 சதவீதமும், கேப்பிட்டல் குட்ஸ் துறை 6 சதவீதமும் குறைந்தன.
உயர்ந்த கச்சா எண்ணெய் விலை, அமெரிக்க பத்திரங்களின் அதிகரித்த யீல்டு, அந்நிய முதலீட்டாளர்களின் தொடர்ந்து வெளியேற்றம் மற்றும் உலகளாவிய வட்டி விகிதச் சூழல் ஆகியவை இந்தியப் பங்குச்சந்தையில் அழுத்தத்தை ஏற்படுத்தின. செப்டம்பரில் அந்நிய முதலீட்டாளர்கள் இந்தியப் பங்குகளில் சுமார் 2.7 பில்லியன் டாலரை வெளியே எடுத்தனர்.
2026-ம் ஆண்டு தொடக்கம் முதல் செப்டம்பர் இறுதி வரை நிஃப்டி 13.4 சதவீதம் சரிந்துள்ளது. இந்த காலகட்டத்தில் அதானி என்டர்பிரைசஸ் 30 சதவீதம் உயர்ந்த நிலையில், இன்ஃபோசிஸ் 38 சதவீதமும், டிசிஎஸ் 36 சதவீதமும் சரிந்துள்ளன.
