ஜிந்தால் ஸ்டீல் நிறுவனத்தின் செப்டம்பர் காலாண்டு ஒருங்கிணைந்த நிகர லாபம் 21 சதவீதம் உயர்ந்து ரூ.771 கோடியாகப் பதிவாகியுள்ளது. அதிகரித்த விற்பனை இதற்கு முக்கியக் காரணமாக அமைந்தது.
நிறுவனத்தின் மொத்த வருமானம் 26 சதவீதம் அதிகரித்து ரூ.15,289.20 கோடியை எட்டியது. எஃகு உற்பத்தி 20 சதவீதம் உயர்ந்து 24 லட்சம் டன்னாகவும், விற்பனை 27 சதவீதம் அதிகரித்து 23.8 லட்சம் டன்னாகவும் இருந்தது.
மொத்த விற்பனையில் உள்நாட்டுச் சந்தையின் பங்கு 92 சதவீதமாகும். நிகர கடன் ரூ.14,786 கோடியாகக் குறைந்தது. காலாண்டில் மூலதனச் செலவு ரூ.1,228 கோடியாக இருந்தது. மேலும், மூலப்பொருள் போக்குவரத்தை மேம்படுத்த பார்பில்–அங்குல் இடையே 192 கிலோமீட்டர் இரும்புத்தாது குழாய் வழித்தடத்தை நிறுவனம் செயல்பாட்டுக்குக் கொண்டுவந்தது.
