கச்சா எண்ணெய் விலை உயர்வு, மொத்த விலைப் பணவீக்கம் அதிகரிப்பு மற்றும் முதலீட்டாளர்களின் லாபப் பதிவு காரணமாக இந்தியப் பங்குச் சந்தைகள் இன்று சரிவுடன் முடிவடைந்தன. முந்தைய நாள் ஏற்பட்ட வலுவான ஏற்றத்துக்குப் பிறகு, முதலீட்டாளர்கள் எச்சரிக்கையுடன் செயல்பட்டனர்.
மும்பை பங்குச் சந்தையின் 30 பங்குகளைக் கொண்ட சென்செக்ஸ் 251.89 புள்ளிகள் (0.34 சதவீதம்) குறைந்து 72,781.89 புள்ளிகளில் நிலைபெற்றது. வர்த்தகத்தின்போது அதிகபட்சமாக 73,195.26 புள்ளிகளையும், குறைந்தபட்சமாக 72,578.75 புள்ளிகளையும் தொட்டது.தேசிய பங்குச் சந்தையின் 50 பங்குகளைக் கொண்ட நிஃப்டி 99.25 புள்ளிகள் (0.44 சதவீதம்) சரிந்து 22,622.70 புள்ளிகளில் முடிந்தது.
பஜாஜ் ஃபைனான்ஸ், மகிந்திரா அண்ட் மகிந்திரா, பஜாஜ் ஃபின்சர்வ், எட்டர்னல், ஐசிஐசிஐ வங்கி, இன்டர்குளோப் ஏவியேஷன் ஆகியவை சரிவைச் சந்தித்தன. இன்ஃபோசிஸ், டெக் மகிந்திரா, டிசிஎஸ், ஹிந்துஸ்தான் யூனிலீவர், என்டிபிசி, ரிலையன்ஸ் இண்டஸ்ட்ரீஸ் பங்குகள் உயர்ந்தன.
உணவு, உற்பத்திப் பொருள்கள், எரிபொருள் மற்றும் மின்சார விலை அதிகரிப்பால், இந்தியாவின் மொத்த விலைப் பணவீக்கம் ஆகஸ்டில் இருந்த 9.92 சதவீதத்திலிருந்து செப்டம்பரில் 11.39 சதவீதமாக உயர்ந்தது. எதிர்பார்ப்பைவிட அதிகமான பணவீக்கம், கடுமையான பணக் கொள்கை குறித்த கவலையை ஏற்படுத்தியதாக சந்தை நிபுணர்கள் தெரிவித்தனர்.
பிரென்ட் கச்சா எண்ணெய் விலை 0.36 சதவீதம் அதிகரித்து பீப்பாய்க்கு 106.1 அமெரிக்க டாலராக இருந்தது. அந்நிய நிறுவன முதலீட்டாளர்கள் செவ்வாய்க்கிழமை ரூ.1,305.13 கோடி மதிப்பிலான பங்குகளை விற்றனர்.
பிஎஸ்இ ஸ்மால்கேப் செலக்ட் குறியீடு 0.72 சதவீதமும், மிட்கேப் செலக்ட் குறியீடு 0.14 சதவீதமும் குறைந்தன. வீட்டுவசதி நிதித் துறை 1.12 சதவீதம், காப்பீடு 1.04 சதவீதம், சுகாதாரம் 0.93 சதவீதம், வாகனத் துறை 0.87 சதவீதம் சரிந்தன.
பொதுப் பயன்பாட்டுச் சேவைகள் துறை 2.07 சதவீதம், மின்சாரம் 1.74 சதவீதம், தகவல் தொழில்நுட்பம் 1.41 சதவீதம், எரிசக்தி 1.28 சதவீதம் உயர்ந்தன. தகவல் தொழில்நுட்பப் பங்குகளின் ஏற்றம் சந்தையின் சரிவை ஓரளவு கட்டுப்படுத்தியது.
அமெரிக்கப் பணவீக்கத் தரவுகளை எதிர்நோக்கிய எச்சரிக்கையும் வர்த்தகத்தில் தாக்கம் ஏற்படுத்தியது. கச்சா எண்ணெய் விலை வர்த்தகத்தின்போது தணிந்ததும், ரிசர்வ் வங்கியின் அந்நியச் செலாவணி நடவடிக்கைகளைத் தொடர்ந்து ரூபாய் மதிப்பு உயர்ந்ததும் சந்தைக்கு ஓரளவு ஆதரவளித்தன.
எனினும், பணவீக்க உயர்வால் பத்திரங்களின் வருவாய் விகிதம் அதிகரித்து, வாகனம், தனியார் வங்கி, உலோகப் பங்குகளுக்கு அழுத்தம் ஏற்பட்டதாக ஜியோஜித் இன்வெஸ்ட்மென்ட்ஸ் ஆய்வுத் தலைவர் வினோத் நாயர் தெரிவித்தார்.
ஆசியச் சந்தைகள் சரிந்தன. ஐரோப்பியச் சந்தைகள் உயர்வுடன் வர்த்தகமாகின.
