தங்கம் விலை மீண்டு வரும் நிலையில், வெள்ளி மற்றும் கச்சா எண்ணெய் வர்த்தகத்தில் எச்சரிக்கை தேவை என சாய்ஸ் புரோக்கிங் நிறுவனத்தின் சந்தை ஆய்வாளர் காவேரி மோரே தெரிவித்துள்ளார்.
கோமெக்ஸ் சந்தையில் தங்கம் 4,200 டாலருக்கு மேல் வர்த்தகமாகிறது. எம்சிஎக்ஸ் சந்தையில் விலை மேலும் உயர, ரூ.1,53,000–ரூ.1,56,900 தடையைத் தாண்டி நிலைத்திருக்க வேண்டும். விலை சரிந்தால் ரூ.1,47,900–ரூ.1,43,700 பகுதியில் ஆதரவு கிடைக்கலாம். டாலர் மதிப்பு, வட்டி விகித எதிர்பார்ப்பு மற்றும் உலக அரசியல் பதற்றம் விலையைப் பாதிக்கலாம்.எம்சிஎக்ஸ் வெள்ளி ரூ.2,25,350 அருகே உள்ளது. ரூ.2,19,800 அருகே ஆதரவு உள்ளது. ரூ.2,29,500-ஐ தாண்டி நிலைத்தால் ரூ.2,36,374 வரை உயர வாய்ப்புள்ளது. தங்கத்துடன் ஒப்பிடும்போது வெள்ளியின் செயல்பாடு பலவீனமாக உள்ளது.
பிரெண்ட் கச்சா எண்ணெய் 105.40 டாலர் அருகே உள்ளது. எம்சிஎக்ஸ் கச்சா எண்ணெய் 2.5 சதவீதம் சரிந்து ரூ.8,650 அருகே வர்த்தகமாகிறது. ஆதரவு ரூ.8,520–ரூ.8,380 பகுதியில் உள்ளது.
ரஷ்யாவின் கூடுதல் டீசல் விநியோகம், பற்றாக்குறையைக் குறைக்கலாம் என்ற எதிர்பார்ப்பு விலைக்கு அழுத்தம் அளித்துள்ளது. டீசல் விநியோக ஒப்பந்தமும், ரஷ்யா–உக்ரைன் இடையே எரிசக்தி போர் நிறுத்தமும் ஏற்பட்டுள்ளதாக டிரம்ப் கூறியதாக ஆய்வறிக்கை தெரிவிக்கிறது. இந்த அறிவிப்புகள் விநியோகம் குறித்த கவலைகளை ஓரளவு குறைக்கக்கூடும்.
இருப்பினும், நிலைமை மாறக்கூடியதாக உள்ளது. உண்மையான விநியோக மாற்றங்களையும் அரசியல் நிகழ்வுகளையும் வர்த்தகர்கள் கவனிக்க வேண்டும். பதற்றம் அதிகரித்தாலோ விநியோகம் தடைப்பட்டாலோ விலை மீண்டும் ஏற்றத்தாழ்வைச் சந்திக்கலாம் என்று அவர் எச்சரித்துள்ளார்.
