அந்நியச் செலாவணி பற்றாக்குறையால் பாதிக்கப்பட்டுள்ள நாடுகள், இந்தியாவிலிருந்து அத்தியாவசியப் பொருட்களைத் தொடர்ந்து இறக்குமதி செய்ய உதவும் வகையில், ரூபாயில் வர்த்தகப் பரிவர்த்தனைகளை மேற்கொள்ளும் நடைமுறையை இந்தியா ஊக்குவித்து வருவதாக மத்திய நிதியமைச்சர் நிர்மலா சீதாராமன் தெரிவித்தார்.
தாய்லாந்து நாட்டின் பாங்காக்கில் நடைபெற்ற சர்வதேச நாணய நிதியம் மற்றும் உலக வங்கியின் ஆண்டுக் கூட்டங்களையொட்டி, அட்லாண்டிக் கவுன்சில் அமைப்புடனான கலந்துரையாடலில் பங்கேற்ற மத்திய நிதியமைச்சர் நிர்மலா சீதாராமன் பேசியதாவது:இந்தியாவிலிருந்து அத்தியாவசியப் பொருட்களை இறக்குமதி செய்யும் நட்பு நாடுகள், முக்கிய சர்வதேச நாணயங்கள் கிடைப்பதில் சிரமங்களை எதிர்கொள்கின்றன.
அத்தகைய நாடுகள் அந்நியச் செலாவணி பற்றாக்குறையால் இறக்குமதியை நிறுத்த வேண்டிய நிலைக்குத் தள்ளப்படாமல் இருக்க வேண்டும். அதற்கு உதவும் வகையில், இந்தியப் பொருட்களுக்கான தொகையை ரூபாயில் செலுத்தும் நடைமுறையை ஊக்குவிக்க நாங்கள் செயலாற்றி வருகிறோம்.
உள்ளூர் நாணயங்களில் வர்த்தகப் பணப்பரிவர்த்தனைகளை மேற்கொள்வது, அந்நியச் செலாவணி நெருக்கடியிலும் வர்த்தகத்தைத் தொடர உதவும்.
இந்தியாவிடமிருந்து பொருட்களை வாங்கும் நாடுகள், அதற்கான பணத்தை ரூபாயில் செலுத்த வேண்டும் என்பதே எங்கள் விருப்பம். முக்கிய சர்வதேச நாணயங்களைப் பெறுவதில் உள்ள சிக்கல், அத்தியாவசியப் பொருட்களை வாங்குவதற்குத் தடையாக அமைந்துவிடக் கூடாது.
போர்கள் உள்ளிட்ட புவிசார் அரசியல் பதற்றங்களும் பொருளாதாரச் சரிவுகளும் பல நாடுகளைக் கடன் நெருக்கடிக்குத் தள்ளுகின்றன. வெளிநாட்டுப் பணப்பரிவர்த்தனைகளை மேற்கொள்வதிலும் அந்த நாடுகள் பிரச்சினைகளை எதிர்கொள்கின்றன. இத்தகைய சூழலில், உள்ளூர் நாணயங்களில் பணம் செலுத்தும் ஏற்பாடுகள் வர்த்தக உறவுகளைத் தக்கவைக்க உதவும்.
இந்த நெருக்கடிகளை எதிர்கொள்வதில் பன்னாட்டு வளர்ச்சி நிறுவனங்களின் செயல்பாடுகளும் முக்கியமானவை. கடந்த காலங்களில் இத்தகைய சவால்களுக்குப் பதிலளிக்க அந்த நிறுவனங்கள் பல ஆண்டுகள் எடுத்துக்கொண்டன. தற்போது நிலைமையைச் சரிசெய்வதற்கான நடவடிக்கைகள் மேற்கொள்ளப்பட்டு வருகின்றன.
சர்வதேசப் பொருளாதார ஒத்துழைப்பைப் பொறுத்தவரை, வலுவான இருதரப்பு உறவுகளை உருவாக்குவதில் இந்தியா கவனம் செலுத்துகிறது. பொருளாதாரக் கூட்டுறவை மேலும் ஆழப்படுத்துவதற்காகப் பல்வேறு வர்த்தக ஒப்பந்தங்களை முன்னெடுத்து வருகிறோம். அவற்றில் முன்னேற்றமும் ஏற்பட்டுள்ளது.
அதேநேரத்தில், தென்கிழக்கு ஆசிய நாடுகளின் கூட்டமைப்பான ஆசியானுடனான தற்போதைய வர்த்தக ஒப்பந்தம் இந்தியாவுக்குப் பாதகமாக உள்ளது. அந்த ஒப்பந்தத்தால் ஆசியான் நாடுகள் பயனடைவதை நாங்கள் எதிர்க்கவில்லை. ஆனால், இந்திய இறக்குமதியாளர்கள், உள்நாட்டுச் சந்தைகள் மற்றும் உற்பத்தியாளர்கள் எதிர்கொள்ளும் பிரச்சினைகளுக்கும் தீர்வு காணப்பட வேண்டும்.
இந்த ஒப்பந்தத்தை இருதரப்பும் மறுஆய்வு செய்து வருகின்றன. அதை மறுசீரமைக்கப்பட்ட வடிவில் தொடரவே இந்தியா விரும்புகிறது. வர்த்தக ஒத்துழைப்பால் கிடைக்கும் பலன்களைப் பாதுகாப்பதுடன், இருதரப்புக்கும் சமநிலையான ஏற்பாட்டை உறுதிசெய்வதே எங்கள் நோக்கம். ஆசியான் நாடுகளுக்குக் கிடைக்கும் நன்மைகளுடன், இந்தியத் தரப்பின் கவலைகளும் கவனத்தில் கொள்ளப்பட வேண்டும்.
அதற்கேற்ப ஒப்பந்தத்தைச் சீரமைப்பதே இந்த மறுஆய்வில் இந்தியா எதிர்பார்க்கும் முக்கிய மாற்றமாகும்.
பிராந்திய விரிவான பொருளாதாரக் கூட்டாண்மையான ஆர்செப் ஒப்பந்தத்தில் இணையாமல் இருப்பது என்ற இந்தியாவின் நிலைப்பாட்டில் மாற்றமில்லை. அந்த ஒப்பந்தத்தில் சேருவது இந்தியாவின் நலனுக்கு உகந்ததாக இருக்காது. எனினும், அதன் உறுப்பு நாடுகளுடன் இந்தியா தொடர்ந்து வர்த்தகம் மேற்கொண்டு வருகிறது. இவ்வாறு நிர்மலா சீதாராமன் பேசினார்.
