நேபாளம், வங்கதேசத்தைப்போல இந்தியாவில் ஆட்சி மாற்றம் நிகழ வாய்ப்பே இல்லை என மத்திய அமைச்சர் பிரஹலாத் ஜோஷி திட்டவட்டமாகத் தெரிவித்துள்ளார்.
இடதுசாரி மாணவர் அமைப்பான ஏஐஎஸ்ஐ தலைவர் நேஹா போரா, வங்கதேசத்தில் ஏற்பட்ட மாணவர் போராட்டத்தை அடுத்து அங்கு ஆட்சி மாற்றம் நிகழ்ந்ததைச் சுட்டிக்காட்டி இருந்தார்.
இதுகுறித்து செய்தியாளர்களிடம் அமைச்சர் பிரஹலாத் ஜோஷி கூறியதாவது:
பாகிஸ்தான், வங்கதேசம், நேபாளத்தைப் போல இந்தியாவில் நடக்க வாய்ப்பே இல்லை. வங்கதேசம் எங்களுக்கு உத்வேகம் அளித்துள்ளதாக நேஹா போரா கூறியதன் பொருள் என்ன? வங்கதேசத்தில் நடந்தது என்ன? அங்கு தேர்ந்தெடுக்கப்பட்ட அரசாங்கம் கவிழ்க்கப்பட்டது.
பதவியில் இருந்த பிரதமர் நாட்டைவிட்டு வெளியேற வேண்டிய கட்டாயம் ஏற்பட்டது. அதைத் தொடர்ந்து, அங்கு சிறுபான்மையினரான இந்துக்கள் பெருமளவில் கொல்லப்பட்டனர். இந்த மாதிரியான சூழலைத்தான் நீங்கள் விரும்புகிறீர்களா? இத்தகைய நபருடன் ராகுல் தொடர்ந்து தொடர்பில் இருப்பது ஏன்? இந்த நாட்டில் என்ன நடக்க வேண்டும் என்று நீங்கள் எதிர்பார்க்கிறீர்கள்?
தேர்தல் தோல்விகளுக்கு பிரதமர் மோடியை குற்றம்சாட்டுவதற்குப் பதிலாக, களப்பணியில் ராகுல் தீவிர கவனம் செலுத்த வேண்டும். நீங்கள் முதல்வராகவோ, பிரதராகவோ தேர்ந்தெடுக்கப்பட வேண்டுமானால் நீங்கள் கடினமாக உழைக்க வேண்டும்.
எதிர்க்கட்சிகளின் சமீபத்திய போராட்டங்களுக்கு மக்கள் மத்தியில் போதிய வரவேற்பு இல்லை என்பது அவர்கள் முன்வைக்கும் கருத்துகளை மக்கள் நிராகரிப்பதில் இருந்தே தெரிகிறது என தெரிவித்தார்.
