இந்தியாவின் ஜவுளி ஏற்றுமதியை அதிகரிக்கும் நோக்கில், இத்துறையில் செயல்படும் 4,000 புத்தொழில் நிறுவனங்களை அடையாளம் கண்டு, அவற்றின் வளர்ச்சிக்கு உதவ மத்திய ஜவுளித் துறை அமைச்சகம் திட்டமிட்டுள்ளது. அடுத்த 3 முதல் 4 ஆண்டுகளில் இந்த நிறுவனங்களை ஏற்றுமதிக்குத் தயார்படுத்தி, சர்வதேசச் சந்தையில் இந்தியாவின் பங்களிப்பை அதிகரிப்பதே இதன் நோக்கமாகும்.
இந்தியாவின் ஜவுளித் துறையில் சிறிய மற்றும் நடுத்தர நிறுவனங்கள் முக்கியப் பங்கு வகிக்கின்றன. இருப்பினும், சர்வதேச சந்தையில் நுழைவதற்குத் தேவையான நிதி, தொழில்நுட்பம், சந்தைத் தொடர்புகள் உள்ளிட்ட வசதிகள் பல நிறுவனங்களுக்குக் கிடைப்பதில்லை. இந்தச் சவால்களைக் குறைத்து, புதிய நிறுவனங்களை ஏற்றுமதியாளர்களாக உருவாக்க மத்திய அரசு நடவடிக்கை எடுத்து வருகிறது.
இதன் ஒரு பகுதியாக, ஜவுளித் துறையில் இயங்கும் சுமார் 4,000 புத்தொழில் நிறுவனங்களை அடையாளம் கண்டு, அவற்றின் தேவைகளுக்கு ஏற்ப ஆதரவு வழங்கத் திட்டமிடப்பட்டுள்ளது. இதற்காகத் தொழில்முனைவோருடன் ஆலோசனைக் கூட்டங்கள் நடத்தப்பட உள்ளன.
சமூக ஊடகங்கள் வழியாகத் தங்களது தயாரிப்புகளை விற்பனை செய்யும் நிறுவனங்களும், உரிய தகுதிகளைப் பெற்றிருந்தால், இந்த முயற்சியில் பங்கேற்க வாய்ப்புள்ளது.
இந்த ஆலோசனைக் கூட்டங்கள் நவம்பர் இறுதியில் அல்லது டிசம்பர் தொடக்கத்தில் தொடங்கும் என எதிர்பார்க்கப்படுகிறது.
தொடர்ந்து, டிசம்பரில் தேசிய அளவிலான புத்தொழில் நிறுவனங்கள் மாநாடு நடத்தவும் திட்டமிடப்பட்டுள்ளது. இதில் நிறுவனங்களின் வளர்ச்சிக்குத் தேவையான உதவிகள், ஏற்றுமதிக்கான வாய்ப்புகள் மற்றும் தொழில் விரிவாக்கத்தில் உள்ள தடைகள் குறித்து விவாதிக்கப்படும்.
மேலும், தகுதியுள்ள நிறுவனங்கள் ‘ஸ்டார்ட்அப் இந்தியா’ திட்டத்தின் கீழ் கிடைக்கும் நிதி உதவி மற்றும் கடன் உத்தரவாத வசதிகளைப் பயன்படுத்திக் கொள்ளவும் வாய்ப்புள்ளது.
இந்த முயற்சி வெற்றியடைந்தால், இந்திய ஜவுளித் துறையில் புதிய ஏற்றுமதியாளர்கள் உருவாகவும், சிறிய நிறுவனங்கள் சர்வதேசச் சந்தையில் விரிவடையவும் வாய்ப்பு ஏற்படும்.
