போப் 14-ம் லியோவுக்கு நுரையீரல் புற்றுநோய் உறுதி செய்யப்பட்டதைத் தொடர்ந்து, அவரது வலது நுரையீரலின் கீழ்ப்பகுதி அறுவை சிகிச்சை மூலம் அகற்றப்பட்டுள்ளதாக வாடிகன் அறிவித்துள்ளது.
அமெரிக்காவில் பிறந்த, 71 வயதான போப் லியோவுக்கு வழக்கமான மருத்துவப் பரிசோதனையின்போது வலது நுரையீரலில் சிறிய கட்டி கண்டறியப்பட்டது. ரோம் நகரிலுள்ள ஜெமெல்லி மருத்துவமனையில் கடந்த 13-ம் தேதி அவருக்கு அறுவை சிகிச்சை நடைபெற்றது.அகற்றப்பட்ட திசுக்களின் பரிசோதனையில், அடினோகார்சினோமா வகை புற்றுநோய் இருப்பது உறுதியானது. காணொளி உதவியுடன் நடைபெற்ற அறுவை சிகிச்சை 90 நிமிடங்கள் நீடித்தது. எந்தச் சிக்கலும் ஏற்படவில்லை என்றும், அவர் நினைவு திரும்பி மருத்துவமனை அறைக்குத் திரும்பியதாகவும் மருத்துவர்கள் தெரிவித்தனர்.
புற்றுநோயின் நிலை, நிணநீர் முடிச்சுகளுக்குப் பரவியுள்ளதா உள்ளிட்ட விவரங்கள் வெளியிடப்படவில்லை. பரிசோதனை முடிவுகளின் அடிப்படையில் அடுத்தகட்ட சிகிச்சை தீர்மானிக்கப்படும்.
அக்டோபர் 20-ம் தேதி வரையிலான அவரது பொது நிகழ்ச்சிகள் ரத்து செய்யப்பட்டுள்ளன. அவர் சுமார் ஒரு வாரம் மருத்துவமனையில் ஓய்வெடுப்பார் என எதிர்பார்க்கப்படுகிறது.
