சீனாவில் கச்சா எண்ணெய் மற்றும் மூலப்பொருட்களின் விலை உயர்வால், செப்டம்பரில் தொழிற்சாலை உற்பத்தியாளர் விலைகள் 5 சதவீதம் அதிகரித்துள்ளன. இது 2022 ஜூனுக்குப் பிறகு பதிவான அதிகபட்ச உயர்வாகும். அதேநேரத்தில், நுகர்வோர் பணவீக்கம் 0.9 சதவீதமாகவே இருந்தது.
சீனாவில் உற்பத்தியாளர்கள் விற்பனை செய்யும் பொருட்களின் விலையை அளவிடும் உற்பத்தியாளர் விலைக் குறியீடு, செப்டம்பரில் முந்தைய ஆண்டின் அதே மாதத்தைவிட 5 சதவீதம் உயர்ந்துள்ளது. பொருளாதார நிபுணர்கள் கணித்த 4.5 சதவீதத்தை இது தாண்டியுள்ளது. நுகர்வோர் விலைக் குறியீட்டின் உயர்வு, எதிர்பார்க்கப்பட்ட ஒரு சதவீதத்தைவிடக் குறைவாகப் பதிவாகியுள்ளது.
மத்திய கிழக்கில் நிலவும் அரசியல் பதற்றம், விநியோகத் தடைகள் மற்றும் எண்ணெய் விலை உயர்வு ஆகியவை தொழிற்துறை செலவுகளை அதிகரித்துள்ளன. எரிபொருள் பதப்படுத்துதல், ரசாயனங்கள், இரும்பு அல்லாத உலோகங்கள் ஆகிய துறைகளில் விலைகள் குறிப்பிடத்தக்க அளவில் உயர்ந்துள்ளன.
எனினும், உற்பத்தியாளர் விலை உயர்வு, மக்களின் நுகர்வு அதிகரித்துள்ளதாக காட்டவில்லை. மூலப்பொருட்களின் செலவு உயர்ந்தாலும், கடும் போட்டி காரணமாகச் சில நிறுவனங்களால் அந்தச் செலவை வாடிக்கையாளர்களிடம் முழுமையாக வசூலிக்க முடியவில்லை. இதனால், லாபம் குறையும் நிலை ஏற்படலாம்.
நுகர்வோர் பணவீக்க உயர்வில் பெட்ரோல் விலையின் பங்களிப்பு 0.47 சதவீதப் புள்ளிகளாக இருந்தது.
உணவு மற்றும் எரிசக்தியைத் தவிர்த்த அடிப்படைப் பணவீக்கம் ஒரு சதவீதமாக நீடித்தது. இது உள்நாட்டு நுகர்வுத் தேவை இன்னும் பலவீனமாக இருப்பதைக் காட்டுகிறது.
வேலைவாய்ப்பு, குடும்ப வருமானம் மற்றும் சொத்துச் சந்தை குறித்த நிச்சயமின்மை, மக்களின் செலவிடும் முடிவுகளைப் பாதிக்கக்கூடும். இதனால், உற்பத்திச் செலவுகளின் உயர்வு பரவலான நுகர்வோர் விலை உயர்வாக மாறுவதில் தடைகள் நீடிக்கின்றன.
பொருளாதாரத்தை ஊக்குவிக்க, உள்கட்டமைப்புத் திட்டங்களுக்காக உள்ளாட்சி அரசுகள் கூடுதலாக 55,000 கோடி யுவான் மதிப்பிலான கடன் பத்திரங்களை வெளியிட சீன அரசு ஒப்புதல் அளித்துள்ளது.
இந்த முதலீடுகள் கட்டுமானப் பொருட்கள், இயந்திரங்கள் மற்றும் தொழிற்துறை சேவைகளுக்கான தேவையை ஆதரிக்கலாம். ஆனால், திட்டங்கள் செயல்படுத்தப்படும் வேகம் மற்றும் முதலீட்டின் தரத்தைப் பொறுத்தே பலன் அமையும்.
தொழிற்துறை முதலீடுகள் வேலைவாய்ப்பு, குடும்ப வருமானம் மற்றும் நுகர்வோர் நம்பிக்கையை வலுப்படுத்துவதே பொருளாதார மீட்சிக்கான முக்கியச் சவாலாக உள்ளது.
