பிலிப்பைன்ஸ் ராணுவத்தை அச்சுறுத்தியதா சீனா? - ஆகாயத்தில் நடந்த சம்பவம்

தென் சீனக் கடலில் உள்ள பாஜோ டி மாசின்லோக் பகுதியில் வழக்கமான கடல்சார் கண்காணிப்பில் ஈடுபட்டிருந்த பிலிப்பைன்ஸ் ராணுவ விமானத்தை, சீனாவின் ஜே-16 போர் விமானம் ஆபத்தான முறையில் இடைமறித்ததாக பிலிப்பைன்ஸ் ஆயுதப் படைகள் குற்றம்சாட்டியுள்ளன.

எனினும், பிலிப்பைன்ஸ் விமானக் குழுவினர் உரிய முன்னெச்சரிக்கையுடன் செயல்பட்டு, தங்களுக்கான கடல்சார் கண்காணிப்புப் பணியை நிறைவு செய்தனர். விமானமும் மேற்கொண்டு எந்தச் சம்பவமும் இன்றி பாதுகாப்பாகத் திரும்பியதாக ராணுவம் தெரிவித்துள்ளது. சட்டபூர்வமான பணிகளில் ஈடுபடும் பிலிப்பைன்ஸ் அரசு கப்பல்கள் மற்றும் விமானங்களுக்கு எதிராகத் தொடரும் பாதுகாப்பற்ற, நிர்ப்பந்திக்கும் நடவடிக்கைகளின் ஒரு பகுதியாக இந்தச் சம்பவத்தை பிலிப்பைன்ஸ் ராணுவம் விவரித்துள்ளது. தனது வீரர்கள் மற்றும் விமானங்களுக்கு அபாயம் ஏற்படுத்தும் நடவடிக்கைகளைத் தொடர்ந்து ஆவணப்படுத்தி வெளிப்படுத்துவோம் என்றும் தெரிவித்துள்ளது.

மேற்கு பிலிப்பைன்ஸ் கடல் பகுதியில் வழக்கமான வான் மற்றும் கடல்சார் கண்காணிப்புப் பணிகள் தொடரும் என்றும், பணியாளர்கள் மற்றும் விமானங்களின் பாதுகாப்புக்கு முன்னுரிமை அளிக்கப்படும் என்றும் ராணுவம் உறுதிப்படுத்தியுள்ளது. கடந்த செப்டம்பரிலும் இதே பகுதியில் கண்காணிப்பில் ஈடுபட்ட பிலிப்பைன்ஸ் அரசு விமானங்களை சீன போர் விமானங்கள் இடைமறித்ததாக பிலிப்பைன்ஸ் தரப்பு தெரிவித்திருந்தது. 

இந்தச் சம்பவம் அதற்கு சுமார் ஒரு மாதத்துக்குப் பின்னர் நிகழ்ந்துள்ளது. ஸ்கார்பரோ ஷோல் என்றும் அழைக்கப்படும் பாஜோ டி மாசின்லோக், பிலிப்பைன்ஸின் சாம்பலெஸ் கடற்கரையிலிருந்து சுமார் 124 கடல் மைல் தொலைவில் அமைந்துள்ளது. பிலிப்பைன்ஸின் 200 கடல் மைல் பிரத்யேக பொருளாதார மண்டலத்துக்குள் இருக்கும் இப்பகுதி, மணிலா–பெய்ஜிங் இடையிலான பதற்றத்தின் முக்கிய மையமாக நீடிக்கிறது. ஜூலையில் இப்பகுதி அருகே பிலிப்பைன்ஸ் கப்பல்கள் மீது சீன கடலோரக் காவல் படை நீர்ப்பீரங்கிகளைப் பயன்படுத்திய சம்பவமும் நிகழ்ந்தது. மீனவர்களுக்கான எரிபொருள் மானியப் பணியில் ஈடுபட்டிருந்த அந்தக் கப்பல்கள், அப்போதும் தங்கள் பணியை நிறைவு செய்தன.